Xalq taʼlimi vaziri Baxtiyor Saidov hududiy xalq taʼlimi boshqarmalari rahbarlari bilan mavjud muammolarni tahlil qildi.

Qayd etilishicha, davra suhbat shaklida oʻtgan mazkur uchrashuvda tizimda mavjud muammo va kamchiliklar, ularni hal etish yoʻllari tahlil qilingan.

“Vazifaga kirishganimdan beri 3 ta hududda boʻldim, ahvol qoniqarli emas. Sizlar kerak boʻlsa hududingizdagi har bir maktabni bilishingiz lozim. U yerda mavjud muammolar, ularni hal etish yoʻllari sizda boʻlishi kerak.

Faoliyatingizni oʻrganib, menda yuzaga kelgan birinchi savol nega hamma viloyatda koʻrsatkich bir xil? Faoliyatingizni taqqoslab bir-biringiz bilan raqobat qiling, raqobat boʻlgan joyda albatta taraqqiyot boʻladi. Oʻzgarishni oʻzingizdan boshlang.

Hududingizda mavjud pedagogika Oliy taʼlim muassasalari bitiruvchilari bilan uchrashuvlar tashkil qiling, yaxshi pedagoglarni izlab toping, professional oʻz ishini yaxshi biladigan pedagoglaringiz ishtirokida boshqa oʻqituvchilaringizga mahorat darslarini tashkil qiling”, — deya taʼkidlagan Baxtiyor Saidov.

Shuningdek, vazir har bir hududiy rahbar oʻz hududi boʻyicha barcha mavjud muammolarni bilishi lozimligi, qancha maktab mavjud boʻlsa, kerak boʻlsa har birining holati haqida bilishi kerakligini qayd etgan.

Bundan tashqari Saidov, suhbat davomida hududlardagi muammolarga yechim sifatida tegishli koʻrsatmalar berib, davlatimiz rahbari tomonidan ishonib topshirilgan ushbu masʼuliyatli ishda har bir hudud rahbariga suyanishi va ulardan faoliyatlarida shijoatli boʻlishlarini soʻragan.

• Ta'lim
• Vazirlik