Internet tarmogʻida tarqalgan koʻchada havo sharlarini sotayotgan yosh bola haqidagi xabar boʻyicha, Toshkent shahar IIBB tomonidan tekshiruv oʻtkazilgan.

Maʼlum boʻlishicha, 2021-yilning 20-noyabr kuni umumtaʼlim maktabi 3-sinf oʻquvchisi 9 yoshli Sh.F. haqiqatdan ham Yunusobod tumani “Billur” mahallasida havo sharlarini sotish maqsadida yurgan. Shu holat yuzasidan Yunusobod tumani IIO FMB xodimlari bolaning otasi – 34 yoshli N.F. bilan bogʻlanishgan.

Fuqaro bilan profilaktik suhbat oʻtkazilib, soʻng unga nisbatan Oʻzbekiston Respublikasi Maʼmuriy javobgarlik toʻgʻrisidagi kodeksining 47-moddasi 1-qismi (“Bolalarni tarbiyalash va ularga taʼlim berish borasidagi majburiyatlarni bajarmaslik”) boʻyicha bayonnoma rasmiylashtirilgan.

• IIB
• Toshkent