Partiya so‘l qanot sifatida mamlakatda ijtimoiy adolat, tenglik va birdamlik tamoyillariga asoslangan demokratik ijtimoiy davlat barpo etishni o‘z oldiga ustuvor vazifa etib belgilagan. Bu haqda O‘zbekiston Xalq demokratik partiyasining rasmiy sahifasida e’lon qilindi.

Xalq demokratik partiyasi elektorati ovozini parlament va hukumatga yetkazish, ularning manfaatlarini samarali himoya qilish hamda mamlakatda kuchli ijtimoiy siyosatni davom ettirish maqsadida o‘zini parlamentdagi muxolifat fraksiyasi deb e’lon qildi.

Parlamentdagi muxolifat fraksiyasi sifatida partiya ikki o‘ng partiya tomonidan tuzilgan parlament ko‘pchiligi – “Taraqqiyot bloki” hamda mazkur blok qo‘llab-quvvatlayotgan hukumat dasturi va faoliyatining quyidagi yo‘nalishlariga qo‘shila olmasligini bildirdi: iqtisodiyotda davlat ishtiroki, strategik ahamiyatga ega kompaniyalar ustidan davlat nazoratini saqlab qolishga e’tiborning pastligi, ularni xususiylashtirish qonun darajasida taqiqlanmaganligi; raqobatbardosh va bozor mexanizmlari orqali boshqariladigan pensiya tizimiga o‘tish bo‘yicha taklif; kommunal to‘lovlar (gaz, elektr energiyasi va boshqalar) masalasida ijtimoiy himoyaga muhtoj aholini qo‘llab-quvvatlashning istiqbolga mo‘ljallangan aniq strategiyasi ishlab chiqilmaganligi; ulushli asosda uy-joy qurish bo‘yicha fuqarolar ulushlarini himoya qilish va kafolatlash tizimining hanuzgacha yaratilmaganligi; aholining daromadiga qarab tabaqalashtirilgan soliq tizimi joriy etilmaganligi (ko‘p mablag‘ topgan ko‘p to‘lashi lozim tamoyilini qo‘llash zarur), shu jumladan qimmatbaho mol-mulk uchun soliqning (hashamat solig‘i) joriy etilmaganligi; farmatsevtika sohasida davlat nazoratining sustligi, mahalliy va xorijiy dori vositalari uchun eng yuqori cheklangan narxlar belgilanmaganligi, shu jumladan dori vositalarining reklamasi taqiqlanmaganligi.

Muxolifat maqomi partiyaga qonun loyihalarini tanqidiy ko‘rib chiqish, muqobil takliflar kiritish va hukumat faoliyati ustidan parlament nazoratini kuchaytirish kabi yangi vakolatlarni beradi.

Bu orqali partiya o‘z dasturining maqsad va vazifalarini samarali amalga oshirish, elektorati manfaatlarini kengroq ifodalash imkoniyatiga ega bo‘ladi.

• O‘zbekiston
• Siyosiy partiya\