AQSh Davlat departamenti amaldagi vizalarga ega bo‘lgan barcha 55 million xorijlikni deportatsiyaga olib kelishi mumkin bo‘lgan migratsiya tartibini buzish holatlari bo‘yicha tekshirish boshlanganini e’lon qildi.

“AQSh vizasiga ega bo‘lgan barcha shaxslar “doimiy nazorat” ostida bo‘lib, ularda viza olish huquqining yo‘qligini ko‘rsatadigan har qanday belgilar aniqlanishi maqsadida tekshiruvlar olib boriladi” — deya ma’lum qilgan AQSH Davlat departamenti “The Associated Press” agentligiga bergan izohida.

Qayd etilishicha, mamlakatda bo‘lish muddatini oshirib yuborish, jinoiy faoliyat yoki terrorchilik faoliyatida ishtirok etish kabi huquqbuzarliklar aniqlangan taqdirda, viza bekor qilinadi va uning egasi mamlakatdan chiqarib yuborilishi mumkin.

Bundan tashqari, davlat kotibi Marko Rubio tijorat yuk mashinalari haydovchilariga ishchi vizalar berish to‘xtatilishini ma’lum qildi. Uning so‘zlariga ko‘ra, xorijiy haydovchilar sonining ko‘payishi yo‘llardagi xavfsizlik va amerikalik haydovchilarning tirikchiligiga tahdid solmoqda. Transport vazirligi endilikda haydovchilar uchun ingliz tilini bilish talablarini kuchaytiradi.

“AP” xabariga ko‘ra, tekshiruvlar viza egalarining ijtimoiy tarmoqlari tahlili va ularning mamlakatlari huquq-tartibot va immigratsiya idoralari ma’lumotlarini qamrab oladi, shuningdek, ular mamlakatda bo‘lgan davrda AQSh qonunlarining har qanday buzilishi hisobga olinadi.

“Milliy xavfsizlikni himoya qilish bo‘yicha majburiyatlar doirasida fevral oyidan beri Davlat departamenti ikki baravardan ko‘proq, shu jumladan o‘tgan yilning shu davriga nisbatan deyarli to‘rt baravar ko‘p talabalar vizalarini bekor qildi” - deyiladi xabarda.

Aksariyat xorijiy fuqarolarga, ayniqsa, uzoq muddatli o‘qish yoki mehnat faoliyatini rejalashtirayotganlarga AQShga kirish uchun viza talab qilinadi. Vizasiz kirish dasturi doirasida esa asosan Yevropa va Osiyoning 40 ta davlatlari fuqarolari istisno qilingan bo‘lib, ularga vizasiz AQShda uch oygacha qolish imkoniyati beriladi.

Eslatib o‘tamiz, AQShda yaqinda 6 mingdan ortiq talabalar vizasi muddatidan oshish va qonun buzilishlari sababli bekor qilindi. Ma’muriyat bir qator boshqa o‘nlab mamlakatlar fuqarolari uchun kirish cheklovlarini sezilarli darajada kengaytirish imkoniyatlarini ko‘rib chiqmoqda.

AQSh ichki xavfsizlik vazirligining ma’lumotlariga ko‘ra, o‘tgan yili mamlakatda 12,8 millionga yaqin grin-kart egasi va 3,6 million miqdorida muddatli vizalarga ega shaxslar ro‘yxatga olingan. Joriy yilda esa O‘zbekiston grin-kart g‘oliblari soni bo‘yicha birinchi o‘rinni egallab, 5564 nafarni tashkil etdi. Shu bilan birga, mamlakatimizdan AQShda ta’lim olayotgan talabalar soni 1219 nafarga yetdi.

• AQSh
• Departament
• Viza
• Xavfsizlik