Energetika obyektlarida xavfsizlik texnikasi qoidalari talablariga rioya qilmasdan ishlarni noto‘g‘ri tashkil etgan 35 ta brigadaning ish faoliyati to‘xtatildi. Bu haqda Elektr energiyasi, neft mahsulotlari va gazdan foydalanishni nazorat qilish inspeksiyasi ma’lum qildi.

Keltirilishicha, xavfsizlik texnikasi qoidalari talablariga rioya etish, baxtsiz hodisalarni oldini olish, mehnat intizomiga rioya qilgan holda ishlarni to‘g‘ri tashkil qilish hamda ish joylarini to‘g‘ri tayyorlash va xavfli ishlab chiqarish vaziyatlarini oldini olishni tartibga solish maqsadida “O‘zenergoinspeksiya” tomonidan energetika obyektlarida o‘rganishlar olib borilgan.

Xususan, joriy yilda 210 ta korxona faoliyatida 1 ming 118 ta qoidabuzilish holati aniqlangan. Shuningdek, ushbu aniqlangan qoidabuzilishlar yuzasidan 407 ta ko‘rsatma berilib, 380 ta soha xodimiga nisbatan intizomiy jazo choralari ko‘rilgan.

O‘rganishlar davomida xavfsizlik texnikasi qoidalari talablariga hamda mehnat intizomiga rioya qilmagan holda ishlarni noto‘g‘ri tashkil etgan 35 ta brigadaning ish faoliyati to‘xtatilgan.

• Energetika_vazirligi