“Barselona” bosh murabbiyi Xavi Ispaniya chempionatining 29-turida “Real Madrid” ustidan qozonilgan yirik hisobdagi gʻalaba (4:0) haqida gapirdi.

“Men ham “Barselona” murabbiyi, ham muxlisiman. Biz bu natijadan bahramand boʻlishimiz kerak. Oʻyin ajoyib boʻldi, lekin mukammal emas.

Yigitlarning oʻyinidan va safarda chempionat peshqadami ustidan qozonilgan gʻalabadan juda mamnunman.

Biz “Real”ga qarshi qanday oʻynashni bildik, koʻp vaziyatlar yaratdik, qanday hujum qilishni bildik, ajoyib oʻyin oʻtkazdik. Ular tashabbusni faqat soʻnggi 20 daqiqada qoʻlga olishdi.

Umuman olganda, bugun ajoyib oʻyin oʻtkazdik, koʻproq gol urishimiz mumkin edi. Biz juda yaxshi oʻynadik va natijadan haqli ravishda bahra olishimiz mumkin.

Chempionatda gʻalaba qozonishimizni bilmayman, lekin hech narsani inkor etib boʻlmaydi. Men “koʻk-anorranglilar” futbolchilari bilan juda faxrlanaman.

Menga shon-shuhrat kerak emas, bu oʻyinchilarda va umuman “Barselona”da boʻlgani yaxshi. Bu futbolchilarning, jamoaning, oilaning gʻalabasi. Men Barsa oilasiga shon-sharaf tilayman. Buning uchun shu yerdaman”, — deydi ispaniyalik mutaxassis.

• Futbol
• Xorij