O‘zbekiston Respublikasi Vazirlar Mahkamasi huzuridagi atom energiyasi agentligi direktori Azim Ahmadxajayev boshchiligidagi delegatsiya 22-aprel kuni Xitoy Xalq Respublikasiga ishchi tashrifini boshladi.

Safar 25-aprelga qadar davom etadi va atom energetikasi sohasida xalqaro hamkorlikni mustahkamlashga, shuningdek, O‘zbekistonda atom elektr stansiyasini qurish loyihasini amalga oshirishning asosiy jihatlarini muhokama qilishga qaratilgan.

Tashrifning birinchi kunida Xitoy milliy yadro korporatsiyasining (CNNC) xalqaro loyihalar uchun mas’ul bo‘lgan ofisida Uzatom agentligi, Rosatom davlat korporatsiyasi va Xitoyning Shanghai Electric kompaniyasi vakillari ishtirokida uch tomonlama uchrashuv bo‘lib o‘tdi.

Shanghai Electric kompaniyasining turbina uskunalarini ishlab chiqarish bo‘yicha imkoniyatlarini baholash va uni O‘zbekistondagi bo‘lajak AESning texnik talablariga moslashtirish variantlarini muhokama qilish muzokaralarning asosiy mavzusi bo‘ldi. Muzokaralar davomida tomonlar AESning yadroviy bo‘lmagan oroli uchun jihozlarni ishlab chiqish, ishlab chiqarish va yetkazib berish bilan bog‘liq masalalarni muhokama qildilar.  Zarur texnologik uskunalarning texnik xususiyatlari va parametrlariga alohida e’tibor qaratildi.

Xitoy tomoni “Uzatom”, “Rosatom” agentligi va CNNC o‘rtasida Xitoy korporatsiyasining loyihani amalga oshirishdagi rolini aniq belgilab beradigan uch tomonlama kelishuvni tayyorlash taklifi bilan chiqdi. Bunday hujjatni imzolash loyihani yanada rivojlantirish yo‘lidagi muhim qadam bo‘ladi.

• AES
• O‘zbekiston
• Xitoy