Amerika Qo‘shma Shtatlari hamda uning Osiyodagi ittifoqchilari Kiyev va Moskva o‘rtasidagi mojaroga nisbatan Gʻarb bilan bir xil prinsip asosida harakat qilib, Tayvan masalasida Xitoy bilan mumkin bo‘lgan qarama-qarshilikka tayyorlanmoqda. Vashington Tokio va Manila bilan harbiy hamkorlikni kuchaytiradi.

Xitoy Tayvanga urush boshlasa, AQSH va Yaponiya harbiylari hamkorlikni kengaytirib, u bilan yuzaga kelishi mumkin bo‘lgan mojaroga tayyorgarlik ko‘rish uchun ko‘proq qo‘shma operasiyalar o‘tkazmoqda. Bu haqda “Financial Times” nashriga AQSH dengiz piyodalari korpusi 3-ekspeditsiya kuchlari qo‘mondoni (Okinavada joylashgan) general-leytenant Jeyms Birman ma’lum qildi.

Birmanga ko‘ra, AQSH va uning Osiyodagi ittifoqchilari Rossiya va Ukraina o‘rtasidagi mojaroda Gʻarb davlatlari qanday yo‘l tutayotgan bo‘lsa, xuddi shunday tamoyilga amal qilmoqda: Ukraina qo‘shinlarini tayyorlash, Kiyevga qurol yetkazib berish va hokazo.

“Biz buni urush teatrining tashkil etilishi deb ataymiz. Biz esa Yaponiya, Filippin va boshqa joylarda tashkil qilamiz”, – dedi general-leytenant.

FT nashrida qayd etilganidek, Ukrainadagi vaziyat bilan bunday “noodatiy ochiq” taqqoslash Pekinning so‘nggi paytlarda Tayvan yaqinida ko‘proq harbiy mashg‘ulotlar o‘tkaza boshlagani bilan bog‘liq. 2022-yil bahorida AQSH prezidenti Jo Bayden Vashington Xitoyning Tayvanga qarshi kuch ishlatish ehtimoliga harbiy javob berishga tayyorligini aytgan edi.

Shundan so‘ng “The New York Times” Oq uy Ukrainaga qurol yetkazib berish tajribasidan foydalanib, Xitoyning ehtimoliy hujumini qaytarish uchun orol mudofaa tizimini qayta jihozlash bo‘yicha sa’y-harakatlar kuchaytirilgani haqida ma’lum qilgan.

• AQSh
• Tayvan
• Urush
• Xitoy