Xitoy va O‘zbekiston o‘rtasida chiqindilardan energiya ishlab chiqarish bo‘yicha memorandum imzolandi.

Ekologiya, atrof-muhitni muhofaza qilish va iqlim o‘zgarishi vazirligida Xitoy Xalq Respublikasining “Chengdu Environment Investment Group” davlat korxonasi vakillari bilan uchrashuv bo‘lib o‘tdi.

Qayd etilishicha, ushbu uchrashuvda O‘zbekistonda chiqindilarni boshqarish sohasida amalga oshirilayotgan islohotlar, investitsiya kiritilishi mumkin bo‘lgan sohalar hamda investorlarga taqdim etiladigan umumiy preferensiyalar haqida ma’lumot berilgan.

Bundan tashqari, Xitoy kompaniyasi bosh direktori Chen Shien O‘zbekistonda amalga oshirilishi kutilayotgan istiqbolli rejalar haqida so‘z yuritgan. Shuningdek, chiqindi tashish uchun mo‘ljallangan poligonlar bilan bir qatorda oqova suv tozalash inshootlari faoliyatiga ham qiziqish bildirilgan.

Bundan tashqari, mehmonlar Vazirlik huzuridagi Situatsion markaz, Sanitar tozalash ishlarini tashkil etish Respublika markazi, chiqindilarni boshqarish poligon direksiyasi faoliyati bilan tanishishdi.

Tashrif yakunida esa “Chengdu Environment Investment Group” davlat korxonasi tarkibidagi “Chengdu Xingrong Renewable Energy Co.Ltd” va “Chengdu Shiny Technology Co.Ltd.” kompaniyalari bilan O‘zbekistonda chiqindilardan energiya ishlab chiqarish loyihalarini ishlab chiqish va amalga oshirish bo‘yicha hamkorlik memorandumi imzolangan.

• Chiqindi
• Hamkorlik
• Xitoy