Xitoy arxeologlari Nankin shahrida (sharqiy Szyansu provinsiyasi) janubiy sulolalardan biri (420-589) Lyan sulolasi davrida qurilgan qadimiy poytaxt darvozalariga olib boruvchi yo‘lni topdilar. Bu haqda “Kazinform” xabar berdi.

“Xinhua” agentligining juma kuni xabar berishicha, qazilgan yo‘lning uzunligi 210 metr va kengligi taxminan 26 metrni tashkil qiladi. Ikki tomondan xandaklar topilgan. Arxeologlarning fikricha, u faqat hukmdorlar uchun mo‘ljallangan.

Bundan tashqari, kengligi taxminan 33 m bo‘lgan qadimiy g‘isht darvoza xarobalari topilgan. Taxminlarga ko‘ra, ular bir vaqtlar Lyan qirolligi poytaxtiga janubiy kirish joyi bo‘lgan joyda joylashgan.

Shuningdek, agentlikning xabar berishicha, 2017-yildan beri arxeologlar Nankin shahrida 12 ming kvadrat metrga yaqin maydonda qazish ishlari olib borgan. Tadqiqotlar davomida hudud tarixini o‘rganish uchun muhim bo‘lgan ko‘plab obyektlar topilgan.

• Xitoy
• darvoza