Hisob palatasi byudjet mablag‘lari sarflanishi yuzasidan maʼlumotlarni rasmiy veb-saytlarga joylashtirib borishga oid hisobotini taqdim qildi.

Tahlillarga ko‘ra, vazirlik va idoralar tomonidan tegishli tartibga rioya qilish ahvoli qoniqarli darajada emas. Xususan, tanlov asosida o‘rganilgan 133 ta tashkilotlar tomonidan rasmiy veb-saytlariga byudjet jarayonining ochiqligini taʼminlaydigan maʼlumotlarning 2022-yil 10-fevral holati bo‘yicha joylashtirilishi tahlil qilinganda, quyidagilar aniqlangan: 

– 66 ta vazirlik va idorada tegishli maʼlumotlar to‘liq ravishda joylashtirilgan; 

– 13 ta vazirlik va idorada tegishli maʼlumotlar qisman taqdim qilingan;

– 54 ta vazirlik va idorada esa tegishli maʼlumotlar umuman joylashtirilmagan.

Shuningdek, Prezident Farmoni  bilan belgilab qo‘yilgan davlat organlari va tashkilotlarining jami 13 ta toifadagi axborotlarni o‘z rasmiy veb-saytida har chorakda eʼlon qilish va davriy yangilab borish to‘g‘risidagi tartibiga ham amal qilmay kelayotgan ayrim davlat organlari va tashkilotlari borligi aytib o‘tildi.

Jumladan, 2021-yil 4-choragida ularning 80 tasi ushbu maʼlumotlarni o‘z vaqtida belgilangan resurslarda joylashtirmagan. 

88 ta davlat idorasi xizmat safarlari va xorijdan tashrif buyurgan mehmonlarni kutib olish bilan bog‘liq xarajatlar bo‘yicha hisobotlarni o‘z vaqtida ochiq taqdim qilmagan.

Shu bilan birga, o‘tgan 2021-yilda fuqarolarni byudjet jarayonida hududlarda jamoatchilik fikri asosida shakllangan tadbirlar natijasida ayrim hududlarda umuman ovoz to‘plamagan hamda “Ochiq byudjet” axborot portalida “g‘olib” deb topilmagan takliflarni moliyalashtirish holatlari aniqlangan. 

Misol uchun, Jizzax viloyati Zarbdor tumanida 4 ta, Xorazm viloyati Urganch shahrida 5 ta taklif o‘rnatilgan talablarga zid ravishda moliyalashtirilgan. Jamoatchilik eshituvi davomida byudjet ochiqligini taʼminlamagan tegishli davlat organlari va tashkilotlari masʼullarining axboroti ham eshitildi.

Mutasaddilarga byudjet jarayonining ochiqligini taʼminlash ustidan nazorat Hisob palatasiga yuklatilgani hamda byudjet jarayonining ochiqligini taʼminlash tartibini buzganlik uchun mansabdor shaxslarga maʼmuriy javobgarlik belgilangani eslatib o‘tildi.

• Davlat byudjeti
• Hisob palatasi
• Hisobot