Xorazm viloyatida viloyat hokimligi “Yagona buyurtmachi xizmati” IK buyurtmachiligidagi “Urganch shahridagi perinatal markazini rekonstruksiya qilish” bo‘yicha o‘tkazilgan tender natijalari o‘rganilganida korrupsiogen holatlar aniqlandi. Bu haqda Korrupsiyaga qarshi kurashish agentligi axborot xizmati ma’lum qildi.

Agentlikning Xabardor.uz'ga ma’lum qilishicha, qiymati 20,4 mlrd. so‘mlik mazkur tender g‘olibi bo‘lgan tashkilot ta’sischisi Xorazm viloyati hokimi o‘rinbosari va  tender komissiyasi raisining yaqin qarindoshi,  ya’ni tug‘ishgan ukasi ekanligi ma’lum bo‘lgan.

Shuningdek, o‘rganishlar mobaynida Jizzax viloyatida 19 ta obyektda 6,3 mlrd. so‘mlik qurilish ishlari to‘lov hujjatlariga asossiz qo‘shib yozilganligi, 941,1 mln. so‘mlik ishlar sifatsiz bajarilganligi, Andijon viloyatida 4 ta obyektda 57,9 mln. so‘mlik ishlar sifatsiz bajarilgani, 1,4 mlrd. so‘mlik aslida bajarilmagan ishlar hisobot hujjatlariga qo‘shib yozilganligi  aniqlanib, jinoyat ishlari qo‘zg‘atilgan.

Qayd etilishicha, Korrupsiyaga qarshi kurashish agentligi tomonidan 2021-yilning 6 oyida 461,3 mlrd. so‘mlik qiymatdagi davlat xaridlari yuzasidan 59 ta qurilish ob’yektlarida o‘rganish o‘tkazilgan.

Ma’lumot uchun, hozirda agentlik tomonidan Hisob Palatasi va Bosh prokuratura bilan hamkorlikda Qurilish vazirligi tizimida Yashirin iqtisodiyot va korrupsiyaga qarshi kurashish hamda uning oldini olish bo‘yicha 2020-2021-yillarga mo‘ljallangan “Yo‘l xaritasi” ishlab chiqilib, tasdiqlandi.

Unga ko‘ra, Qurilish sohasini tartibga soluvchi 25 ta normativ-huquqiy hujjatlar va 30 ta ichki idoraviy hujjatlar tahlil qilinib, 126 ta ehtimoliy korrupsion xavflar aniqlandi hamda ularni bartaraf etishga qaratilgan tegishli chora-tadbirlar belgilandi.

• Aksilkorrupsiya
• Korrupsiya