Britaniya, Xitoy, Rossiya, AQSh va Fransiya strategik xatarlarni kamaytirishni hamda o‘zaro urushning oldini olishni o‘zlarining asosiy vazifasi deb biladi. Yadro quroliga ega ushbu davlatlar dushanba, ya'ni, joriy yil 3-yanvar kuni e’lon qilgan qo‘shma bayonotda yadroviy urushda g‘oliblar bo‘lishi mumkin emasligi va bunday urush hech qachon boshlanmasligi kerakligi qayd etilgan.

Xususan, qo‘shma bayonotni imzolagan davlatlar yadro qurollari bir-biriga yoki boshqa davlatga qaratilmaganligini tasdiqlagan.

Shuningdek, ular har qanday yadroviy tahdidga qarshi turishning muhimligini eslatib, yadro qurollarini tarqatmaslik, qurolsizlanish va qurollanish ustidan nazorat bo‘yicha ikki tomonlama va ko‘p tomonlama kelishuvlarga rioya qilish zarurligini ta’kidlagan.

Bayonotga qo‘shilgan davlatlar yadro qurolidan xoli dunyoni barpo etishni maqsad qilgan holda qurolsizlanish sohasida yanada qulayroq xavfsizlik muhitini yaratish uchun barcha davlatlar bilan hamkorlik qilish istagini bildirib o‘tishgan.

Yuqoridagi davlatlarning fikricha, yadro qurollari mavjud ekan, ular mudofaa maqsadlariga, tajovuzni to‘xtatish va urushning oldini olishga xizmat qilishi kerak. “Yadroviy beshtalik” yadro qurolidan foydalanishning uzoqqa cho‘ziladigan oqibatlaridan xabardor.

Qayd etilishicha, mazkur bayonet Rossiya tashabbusi bilan tayyorlangan.

• AQSh
• Britaniya
• Fransiya
• Rossiya
• Xitoy