Davlat ekologiya qo‘mitasi 2020-yil 22-fevralda jinoyat ishi qo‘zg‘atilib, ishning 2 nafar  ayblanuvchilaridan katta miqdorda moddiy zarar undirilgan ish bo‘yicha qo‘shimcha ma’lumot berdi.

Unga ko‘ra, 2020-yilda Toshkent shahar Yakkasaroy tumani, Yunus Rajabiy mahallasidagi ko‘p qavatli uylar oralig‘ida 81 tup daraxtlar noqonuniy kesilgan bo‘lib, tegishli barcha hujjatlar rasmiylashtirilib, prokuratura organlariga yuborilgan.

Ushbu holatni sodir etgan  “Building And Supplies” MChJ tomonidan yetkazilgan moddiy zarar – jami 1 891 263 000  so‘m miqdoridagi mablag‘ esa ayni paytda Davlat ekologiya qo‘mitasi hisob raqamiga o‘tkazib berilgan.

Eslatib o‘tamiz, avvalroq deputat Kusherbayev Ekoqo‘mitaga o‘tkazilishi kerak bo‘lgan pul mablag‘lari Toshkent shahar prokuraturasi hisob raqamida turgani haqida yozgan, ammo bir muddat o‘tib bu haqdagi postini o‘chirib yuborgan edi.  

Ma’lumot uchun, Toshkent shahar hokimining 2018-yil 18-apreldagi 608-sonli qaroriga asosan, “Building And Supplies” MChJga “Yunus Rajabiy” mahallasi 72, 66/1, 66/2 va 66/4-uylar oralig‘ida 0,5 gektar  yer maydoni ko‘p qavatli turar joy binolarini qurish uchun doimiy foydalanishga ajratib berilgan bo‘lgan.

Ushbu qaror shaharsozlik qoidalariga zid bo‘lgani uchun shahar prokurori tomonidan 2018-yil 4-iyulda protest keltirilgan.

Shahar hokimining 2018-yil 17-iyuldagi 1053-sonli qaroriga ko‘ra, protest qanoatlantirilgan va 608-sonli qaror bekor qilingan.

• Ekologiya