Ijtimoiy tarmoqlarda Yangi Namangan tumani hokimi Jobir Abdullayevning tadbirkor Anasxon Dedabayevni kurakda turmaydigan so‘zlar bilan haqorat qilgan audiosi tarqaldi.

Kecha, 3-dekabr kuni ushbu masalada Namangan viloyati hokimi Shavkatjon Abdurazoqov boshchiligida kengaytirilgan muhokama yig‘ilishi o‘tkazilgan.

Unda Yangi Namangan tumani hokimi J.Abdullayevga “hayfsan” intizomiy jazosi qo‘llanilib, uch oy davomida barcha turdagi rag‘batlantirishlardan mahrum qilingan.

Shuningdek, yig‘ilishda joriy yil davomida ijtimoiy tarmoqlarda shahar va tumanlar hokimliklari, viloyat boshqarmalari, tegishli tashkilotlar rahbarlarining xatti-harakatlari bo‘yicha yoritilgan masalalar ham atroflicha muhokama qilingan.

“Hokimning bu qilig‘ini aslo oqlab bo‘lmaydi. Bunday mavqedagi davlat xizmatchisi aslida barchaga o‘rnak va namuna bo‘lishi kerak. Jumladan, muomala, aholi bilan munosabat borasida ham. Namanganliklar farzandlarini ham sizlab gapiradi axir”, – degan viloyat hokimi.

• Hayfsan
• Hokimlik
• Namangan