14-aprel kuni Prezident Mirziyoyevga Yangi Toshkentdagi Chirchiq daryosi bo‘yidagi 20 gektar maydonda okeanarium qurish loyihasi taqdim etildi. Qurilish vaziri o‘rinbosarining so‘zlariga ko‘ra, u Markaziy Osiyodagi eng yirik shunday obyekt bo‘ladi.

Yangi Toshkent shahri qurilish direksiyasi direktori, qurilish va uy-joy kommunal xo‘jaligi vaziri o‘rinbosari Davronjon Odilov “O‘zbekiston 24” telekanaliga bergan intervyusida okeanarium Markaziy Osiyodagi eng yirigi bo‘lishini aytgan.

“Loyihada savdo va ko‘ngilochar markazlar, xizmat ko‘rsatish obyektlari, bitta yirik 4 yulduzli mehmonxona mavjud. U Chirchiq daryosi bo‘yida 20 gektar maydonda joylashadi. Shuningdek, ushbu loyiha Yangi Toshkentga investitsiya kiritish hajmini oshirish, yangi imkoniyatlar va ish o‘rinlari yaratish imkonini beradi”, — deydi u.

Loyiha amalga oshirilishi natijasida 1600 ta yangi ish o‘rni yaratilishi kutilmoqda.

Avvalroq Toshkent viloyati hokimligi Parkent tumanida 20 gektar maydonda akvapark, attraksionlar, basseyn va boshqa inshootlar qurish rejalashtirilayotgani haqida xabar bergandi. Loyihaning qiymati 30 million dollarga baholanmoqda.

• Loyiha
• Shavkat Mirziyoyev
• Toshkent