Ma’lum qilinishicha, Yangi Toshkent shahrida bir-biriga bog‘langan metro va tramvay tarmoqlarini qurish rejalashtirilyapti. Yangi shaharga metroning ikkita liniyasi orqali – “Buyuk ipak yo‘li” va “Do‘stlik” bekatlaridan 30-35 daqiqada borish mumkin bo‘ladi.

“Agar buni boshlamasak, Toshkentda 5 yildan keyin odamlar yasholmaydi”, deya Yangi Toshkent shahri qurilishiga izoh berdi prezident Shavkat Mirziyoyev. Prezident 5-sentabr kuni, Yangi Toshkent shahri bosh rejasining davlat rahbari uchun qilingan taqdimotida: “32 yil ichida birinchi marta namunaviy, jahon standartlariga mos loyiha qilyapmiz. Bu 300-400 yilga, nevara-chevara va hokazo kelgusi avlodlarimizga qolishi kerak, bizdan keyingi avlod ham buni davom ettirishi kerak”, – deya ta’kidladi.

Qurilish vaziri o‘rinbosari, Yangi Toshkent shahrini barpo etish direksiyasi rahbari Davronjon Odilovning aytishicha, transport-logistika masalasi bo‘yicha Janubiy Koreya, Germaniya va Turkiyadan mutaxassislar jalb qilinib, hozirgi mavjud Toshkent shahrining transport makromodeli yaratilgan.

“Ikkita metro liniyamiz yangi shahar bilan bog‘lanadi. “Buyuk ipak yo‘li” va “Do‘stlik” metro bekatlaridan 30-35 daqiqada yangi shaharga yetib kelish imkoniyati yaratiladi. Bu aholi uchun juda katta qulaylik bo‘ladi, avtomobilda kelishga ehtiyoj ham qolmaydi”, – dedi Davronjon Odilov “Menimcha” teleko‘rsatuvida namoyish etilgan intervyusida.

Eslatib o‘tamiz, 2022-yilning noyabrida Shavkat Mirziyoyevning Parijga tashrifi chog‘ida Toshkent tramvayini qurish bilan Fransiyaning Alstom kompaniyasi shug‘ullanishiga kelishilgandi.

• Metro
• Toshkent
• Tramvay