O‘zbekiston innovasion rivojlanish vaziri Ibrohim Abdurahmonov boshchiligidagi delegasiya Tokioda Yaponiya Xalqaro hamkorlik agentligi katta vise-prezidenti Keichiro Nakazava bilan uchrashdi. Bu haqda “Dunyo” axborot agentligi xabar berdi.

Qayd etilishicha, ushrashuvda tomonlar Orol dengizining qurigan tubi hududida tadqiqotlar olib borish uchun ilmiy stansiya yaratish, Orolbo‘yi hududini iqtisodiy rivojlantirish, yoshlarni ish bilan ta’minlash maqsadida Yaponiyaning kichik innovasion texnologiyalarini jalb qilishda hamkorlik olib borish masalalarini muhokama qildi.

Shuningdek, startaplarni qo‘llab quvvatlash va yoshlarda tadbirkorlik ko‘nikmalarini rivojlantirish uchun qo‘shma akselerator dasturini tashkil etish bo‘yicha fikrlar almashildi.

Keichiro Nakazava O‘zbekiston bilan qishloq xo‘jaligini rivojlantirish sohasida kredit shartnomasini imzolash uchun Toshkentga amalga oshirgan safarini samimiy esga oldi. O‘zbekistonda hayotga tadbiq etilayotgan islohotlar unda katta ijobiy taassurot qoldirganini ta’kidlab o‘tdi. O‘z o‘rnida ilm-fan va innovasiyalar sohasiga ham respublika rahbariyati tomonidan qaratilayotgan e’tibor yaqin kelajakda katta natijalar keltirishiga ishonch bildirdi.

Ibrohim Abdurahmonov esa Yaponiya bilan hamkorlik darajasini yuqori baholab, hozirgi kunda amalga oshirilayotgan ishlar bo‘yicha ma’lumot berdi. Jumladan, O‘zbek-yapon yoshlar innovasion markazi faoliyatini takomillashtirish borasida hamkorlikda amalga oshirilgan moliyaviy va infratuzilmaviy o‘zgarishlar, Orolbo‘yi hududida qishloq xo‘jaligini rivojlantirish va ekologik holatni yaxshilash bo‘yicha O‘zbekiston va Yaponiya olimlari hamkorligida bajarilayotgan qo‘shma tadqiqotlar qayd etildi.

• Orol dengizi
• O‘zbekiston
• Yaponiya