Yaponiya AQShning F16 qiruvchi samolyoti Aomori aeroportiga qo‘nishi oldidan aholi yashash punktlari ustiga yonilg‘i baklarini tashlab yuborishi yuzasidan AQShga murojaat qildi. Yaponiya hukumati bosh kotibi Xirokadzu Matsunoga ko‘ra, bu holat "mahalliy aholida xavotir uyg‘otgan".

"Kecha Amerikaning F16 qiruvchi samolyoti ayrim nosozliklar tufayli Aomori aeroportiga qo‘ndi. Qo‘nish uchun samolyot ikkita yonilg‘i bakini tashlab yuborgan. Hozirgacha ushbu holat yuzasidan jabrlanganlar haqida xabar tushganicha yo‘q", – dedi u Tokioda bo‘lib o‘tgan matbuot konferensiyasida.

Hukumat bosh kotibining aytishiga ko‘ra, yonilg‘i baklaridan biri  Fukaura qishlog‘i hududidan topilgan, ikkinchisi esa hanuzgacha qidirilmoqda.

"Bunday voqealar mahalliy aholi o‘rtasida xavotir uyg‘otmoqda va aslida bunday hodisalar bo‘lishi mumkin emas. Amerika tomoniga chuqur afsusda ekanligimizni yetkazdik, bundan tashqari qiruvchi samolyotni Aomori aeroportidan tezroq chiqarish, yonilg‘i baklarini olish, xavfsizlikni ta’minlash va hodisa sabablarini o‘rganish, samarali qarorlar qabul qilib, bu haqda bizga ma’lumot berish yuzasidan o‘z talablarimizni yetkazdik", – dedi Yaponiya hukumati bosh kotibi.

• AQSh
• Yaponiya
• aviatsiya