Turizm va sport vazirligi huzuridagi Madaniy meros agentligi direktori Shahriyor Nurulloyev Yaponiya xalqaro hamkorlik agentligi (JICA)ning O‘zbekistondagi vakolatxonasi direktorining birinchi o‘rinbosari Yoshimasa Takemura vakillari bilan uchrashdi.

Qayd etilishicha, uchrashuv O‘zbekiston Respublikasi Prezidentining 2019-yil 28-dekabrdagi “O‘zbekiston Respublikasi va Yaponiya o‘rtasida ikki tomonlama hamkorlikni yanada kengaytirish va mustahkamlash chora-tadbirlari to‘g‘risida”gi PQ-4553-sonli qarorida belgilangan topshiriqlar ijrosini ta’minlash, xususan,  O‘zbekiston Respublikasida Buyuk Ipak yo‘li madaniy meros arxivlarini saqlash va raqamlashtirish hamda ikki mamlakat o‘rtasida madaniy merosni asrash yo‘nalishida hamkorlik aloqalarini mustahkamlash maqsadida tashkil etilgan.

Xabarda keltirilishicha, uchrashuv yakunida tomonlar loyiha hujjatlarini O‘zbekiston va Yaponiya o‘rtasida diplomatik aloqalar o‘rnatilganligining 30-yilligiga bag‘ishlangan tadbirlar doirasida imzolash marosimini o‘tkazishga kelishib olishgan.

Eslatib o‘tamiz, JICA  tomonidan 2021-yilning 10-30-iyun kunlari O‘zbekiston tarixi davlat muzeyi hamda Termiz arxeologiya muzeylarida va Termiz shahri yaqinidagi arxeologik obyektlarda o‘rganish ishlari olib borilgandi. O‘rganish natijalariga ko‘ra 2021-yil 29-oktabr kuni Madaniy meros agentligida loyihaning dastlabki muhokama yig‘ilishi bo‘lib o‘tgan edi.

• Yaponiya