Bugun 2-oktyabr kuni Toshkent shahar Yashnobod tumanining ayrim hududlarida elektr energiyasi ta’minotida uzilishlar kuzatildi. Bu haqda Toshkent shahar elektr tarmoqlari korxonasi AJ Matbuot xizmati xabar berdi.

Qayd etilishicha, soat 09:40 da Yashnobod tumanining Aviasozlar mavzesi 3 va 4-dahalarida, 58-sonli Xarbiylar shaharchasi, Yangiobod mavzesi, Asalobod hamda Dubovaya ko‘chalaridagi aholi yashash xonadonlarida elektr energiyasi ta’minotida uzilish sodir bo‘lgan.

Tuman hududida joylashgan quvvati 110/35/10 kilovatt bo‘lgan yuqori kuchlanishli “Hosilot” nimstansiyasining quvvati 10 kilovatt bo‘lgan qismida avariya holatida elektr energiyasidan uzilish sodir boldi.

“Mazkur nosozlik “Toshkent shahar elektr tarmoqlari korxonasi” AJ rahbariyati tomonidan zudlik bilan nazoratga olinib, yuzaga kelgan avariyani bartaraf etish ishlariga kirishildi.

Jumladan, jamiyatning tegishli bo‘lim, xizmatlari, tezkor avariyani bartaraf etish brigadalari tomonidan yuqori kuchlanishli elektr uzatish tarmog‘ini ko‘rikdan o‘tkazish va nosozlikni bartaraf etish ishlari olib borilmoqda”, – deyiladi xabarda.

Hududdagi barcha brigadalar zarur himoya vositalari, zarur elektr qurilmalari hamda maxsus avtotransport vositalari bilan jihozlangan.

Ta’kidlanishicha, tez orada yuzaga kelgan nosozlik to‘liq bartaraf etilib, tarmoq orqali elektr energiyasi yetkazib berilishi boshlanadi.

• Elektr energiyasi
• Toshkent