Yеvropa tiklanish va taraqqiyot banki Boshqaruvchilar Kengashining 32-yillik yigʻilishining 2-kunida bir qator hujjatlarni imzolash boʻyicha marosimlar boʻlib oʻtmoqda.

Biznes forumning ikkinchi kunida, hozircha jami 4,5 mlrd AQSh dollarlik hujjatlar imzolandi.

Unga koʻra, Oʻzbekiston hukumati va YeTTB oʻrtasida Samarqand shahrida elektrobuslar qatnovini yoʻlga qoʻyish uchun 49 million AQSh dollarigacha miqdorda suveren kredit ajratish toʻgʻrisida bitim imzolandi.

Investitsiyalar, sanoat va savdo vazirligi, Energetika vazirligi va TAQA Energetika kompaniyasi oʻrtasida umumiy quvvati 1 600 MVt.gacha boʻlgan kombinatsiyalashgan gaz-turbinali uskunani oʻrnatish loyihasini amalga oshirish boʻyicha esa 1,2 milliard AQSh dollarlik kelishuvga erishildi.

Shuningdek, Investitsiyalar, sanoat va savdo vazirligi, Energetika vazirligi va “Masdar” kompaniyasi oʻrtasida 2,6 milliard AQSh dollari miqdorida quvvati 2 150 MVt va 500 MVt boʻlgan foto va shamol elektr stansiyalari loyihalarini birgalikda ishlab chiqish boʻyicha bitim imzolandi.

Investitsiyalar, sanoat va savdo vazirligi va Xalqaro moliya korporatsiyasi oʻrtasida Toshkent shahrida elektr energiyasini taqsimlash loyihasi boʻyicha 300 million AQSh dollarlik moliyaviy va konsalting xizmatlarini koʻrsatish toʻgʻrisida hujjat imzolandi.

Bundan tashqari, Investitsiyalar, sanoat va savdo vazirligi, “Oʻzsuvtaʼminot” aksiyadorlik jamiyati va Fransiyaning “Suez” kompaniyasi oʻrtasida Surxondaryo viloyatida suv taʼminoti tizimini yaxshilash boʻyicha umumiy qiymati 500 million AQSh dollarilik loyihani amalga oshirish toʻgʻrisida bitim imzolandi.

Investitsiyalar, sanoat va savdo vazirligi va ACWA Power kompaniyasi oʻrtasida “Yashil vodorod” loyihasini rivojlantirish boʻyicha umumiy qiymati 88 million AQSh dollarlik investitsiya shartnomasi imzolandi.

• Samarqand
• YeTTB