Yevropa Ittifoqiga a’zo 15 ta davlat 40 ming afg‘on aholisini doimiy yashash uchun qabul qilishga rozi bo‘ldi. Bu haqida Yevropa Ittifoqining ichki ishlar bo‘yicha komissari Ilva Yoxansson ushbu davlatlar ichki ishlar vazirlari bilan uchrashuvdan so‘ng ma’lum qildi, deya xabar bermoqda “Al-Jazira”.
Xabarda keltirilishicha, Germaniya afg‘on qochqinlarining asosiy qismini – 25 ming nafarini, Niderlandiya – 3159 ta, Ispaniya va Fransiyaning har biri – 2,5 ming, qolgan 11 davlat 7 mingga yaqin qochqinni o‘z hududiga joylashtiradi.
Shuningdek, Ilva Yoxansson mazkur qaror Yevropa Ittifoqi davlatlari o‘rtasidagi samarali birdamlikning namunasi ekanligini ta’kidlab, 40 ming qochqinning qabul qilinishi qochqinlarning noqonuniy ravishda kelishining oldini olishga yordam berishini aytgan. 
Ma’lumotlarga ko‘ra, joriy yil oktyabr oyi boshida BMT Yevropa Ittifoqini besh yil davomida 42,5 ming afg‘onni qabul qilishga chaqirgan edi, biroq Yevropa Ittifoqiga a’zo 27 davlatdan ba’zilari bu taklifga keskin qarshi bo‘lgan. Xususan, ular orasida Xorvatiya, Gretsiya va Ruminiya bor.

• Afg‘oniston
• Yevroittifoq