Prezident Shavkat Mirziyoyev kommunal xizmatlarni yaxshilash va aholini ichimlik suvi bilan taʼminlash borasidagi ishlar hisoboti bilan tanishdi.

Qayd etilishicha, ayni vaqtda Oʻzbekistonda 39 ming 700 taga yaqin koʻp qavatli uylar bor. Ularda yashovchi aholiga sifatli xizmat koʻrsatish maqsadida boshqaruv-servis kompaniyalari tashkil etilmoqda. Joriy yil boshida bunday tashkilotlar 324 ta boʻlgan boʻlsa, bugungi kunga kelib ularning soni 766 taga yetgan. Shu tariqa, 36 mingdan ziyod yoki 92 foiz koʻp qavatli uylar boshqaruv-servis kompaniyalari bilan qamrab olingan.

Bu yilning oʻzida ular tomonidan qurilish, taʼmirlash, texnika va uskunalar xarid qilishga 262 milliard soʻm investitsiya kiritilgan. Yangi tashkil etilgan kompaniyalarda 14 mingga yaqin ish oʻrni yaratilgan.

Koʻp qavatli uylarning yarmidan koʻpi markazlashgan va individual issiqlik taʼminoti tizimiga ega. Qolganlari muqobil pechlar, elektr isitgichlar yoki boshqa uskunalar yordamida isitiladi.

Ayni vaqtda uy-joy kommunal xizmat koʻrsatish vazirligi tasarrufida 495 ta qozonxona faoliyat yuritmoqda. 2018-2021-yillarda ularning 47 tasi va 78 kilometr issiqlik tarmogʻi rekonstruksiya qilingan. Bu yil Buxoro, Samarqand, Qarshi, Jizzax, Namangan, Asaka kabi shaharlardagi yana 24 ta qozonxona va 182 kilometr tarmoq yangilangan. Natijada 70 ming xonadon va 113 ta ijtimoiy obyekt uzluksiz issiqlik energiyasi bilan taʼminlangan.

2023-yilgi investitsiya dasturi doirasida 3 ta yangi qozonxona qurish, 10 tasini taʼmirlash va issiqlik tarmoqlari tortish rejalashtirilgan.

Aholini markazlashgan ichimlik suvi bilan taʼminlash maqsadida joriy yilda 527 ta inshoot hamda qariyb 7 ming kilometr tarmoq barpo etilgan. Yil boshida aholining ichimlik suvi bilan taʼminlanganlik darajasi 70 foiz boʻlgan boʻlsa, yil yakunida bu koʻrsatkichni 74 foizga yetkazish rejalashtirilgan.

Mahallalar kesimida aytganda, 9 ming 309 ta mahalladan 3 ming 800 tasi toʻliq, qariyb 4 mingtasi qisman markazlashgan ichimlik suvi bilan taʼminlangan. Qolgan qishloqlarga suvni transportda yetkazish, shu bilan birga, imkoni bor joylarga tarmoq tortish choralari koʻrilayotgani qayd etilgan. Jumladan, 2023 yilda Investitsiya dasturiga asosan 62 ta, “Obod qishloq” va “Obod mahalla” dasturlari doirasida 373 ta obyekt foydalanishga topshirilishi rejalashtirilgan.

Natijada 403 ta mahalladagi 3 milliondan ziyod aholining ichimlik suvi taʼminotini yaxshilash, 181 ta mahallani ilk bor ushbu tarmoqqa ulash nazarda tutilgan.

• Hisobot
• Prezident