Oliy Majlis Qonunchilik palatasining Mehnat va ijtimoiy masalalar qo‘mitasi tomonidan “O‘zbekiston – 2030” strategiyasini “Yoshlar va biznesni qo‘llab-quvvatlash yili”da amalga oshirishga oid davlat dasturi loyihasining muhokamasiga bag‘ishlangan yig‘ilishi o‘tkazildi.

Unga ko‘ra, 1-iyundan boshlab yolg‘iz yashayotgan, yolg‘iz keksalar va nogironligi bo‘lgan shaxslarga Toshkent shahrida tajriba tariqasida tegishli yo‘nalishdagi nodavlat tashkilotlar orqali Ijtimoiy himoya milliy agentligi mablag‘lari hisobidan ijtimoiy xizmatlar ko‘rsatish amaliyoti yo‘lga qo‘yilishi belgilanmoqda.

“Davlat dasturi loyihasida belgilangan vazifalardan yana biri band bo‘lmagan shaxslar, kambag‘al oilalarning ishsiz a’zolari va yoshlarni amaliy monomarkaz, davlat va nodavlat ta’lim muassasalarida kasb-hunar, xorijiy tillar va tadbirkorlik ko‘nikmalariga o‘qitish orqali ularning bandligiga ko‘maklashish masalasi o‘ta dolzarbligi bilan e’tiborimizni tortdi”, – degan qo‘mita raisi Mavluda Xo‘jayeva.

Shuningdek, aholini mehnat faoliyatiga jalb qilish uchun qulay shart-sharoitlar yaratish orqali ishsiz aholini ishga joylashtirishga ko‘maklashish, kambag‘al oilalar muammolarini hal etish orqali mamlakatda kambag‘allik darajasini kamaytirish, hududlar kesimida kambag‘al aholining balansini shakllantirish bo‘yicha 2024-yilga mo‘ljallangan islohotlar ham muhokama qilingan.

• Keksalar
• Loyiha
• Nogironlik