O‘zbekiston elchixonasida “Mughals the Series” kompaniyasi prodyuseri Mamta Kaash hamda “Scenario films” kompaniyasi ssenariy muallifi Garet Jons bilan uchrashuv o‘tkazildi, deb xabar qilmoqda “Dunyo” AA.

Muloqot davomida buyuk shoir va davlat arbobi Zahiriddin Muhammad Bobur to‘g‘risida film yaratish bo‘yicha loyihani amalga oshirish masalalari muhokama qilingan.

Britaniya tomoni mazkur filmning ssenariysi “Boburnoma” tarixiy asari asosida ishlab chiqilishi, shuningdek, filmning ingliz tilida tasvirga olinishi va uni g‘arb davlatlarining katta ekranlarida namoyish etish imkoniyati mavjud ekanligini qayd etgan.

Xorijiy tomon taklif etilayotgan film o‘zbek xalqining Bobur siymosida Buyuk Britaniya hamda g‘arb mamlakatlari xalqiga, uning boy tarixi va madaniyati, urf-odat va qadriyatlari bilan keng tanishtirishga xizmat qilishiga ishonch bildirdi.

Suhbat yakunida ushbu filmni tasvirga olish masalalarini batafsil muhokama etish uchun britaniyalik ijodkorlar va O‘zbekiston Madaniyat vazirligi hamda Kinematografiya agentligi vakillari o‘rtasida onlayn uchrashuv o‘tkazishga kelishib olingan.

• Loyiha
• Zahiriddin Muhammad Bobur
• film