Toshkent viloyati Zangiota tumanida 13 yoshli qizga o‘gay onasi tomonidan muntazam ravishda jismoniy va ruhiy zo‘ravonlik qilingani aniqlandi.

Ma’lum bo‘lishicha, Bolalar ombudsmaniga jamoatchilik faollaridan Zangiota tumanidagi 13 yoshli S.R. (qiz)ga nisbatan uning o‘gay onasi tomonidan muntazam ravishda jismoniy va ruhiy zo‘ravonlik qilinayotgani yuzasidan murojaat va videomaterial kelib tushdi.

Holat ichki ishlar organlari tomonidan o‘rganilganda, videoda 2010-yilda tug‘ilgan S.R.ga otasi S.S.ning turmush o‘rtog‘i S.Sh. tomonidan zo‘ravonlik qilinganligi holati ekanligi aniqlangan.

Bu fakt yuzasidan S.S. ham tuman IIBga murojaat qilib, turmush o‘rtog‘iga qonuniy chora ko‘rishni so‘ragan.

Hozirda mazkur holat yuzasidan tergovga qadar tekshiruv ishlari olib borilmoqda. Dastlab voyaga yetmagan S.R. sud-tibbiyot ekspertizasidan o‘tkazilib, tanasida tan jarohatlari aniqlanmagan.

Qizcha bilan yakka tartibda psixolog suhbati o‘tkazildi va hozirda bolaga ruhiy zo‘ravonlik yetkazilganligini va uning darajasini aniqlash uchun ekspertiza tayinlangan.

Qaramog‘ida bo‘lgan bolaga zo‘ravonlik qilganligi aytilayotgan S.Sh.ning ruhiy holatiga ham huquqiy baho berish uchun ekspertiza tayinlangan.

Mazkur fakt bo‘yicha olib borilayotgan tergovga qadar tekshiruv Zangiota tumani prokuraturasi nazoratida.

• IIB
• Ombudsman
• Toshkent viloyati
• Zangiota