ITIM 2016-yilga nisbatan uch pog‘ona yuqorilab, Markaziy Osiyodagi eng yaxshi ilmiy markazlar reytingida 10-o‘rinni egalladi. Bu haqida Prezident Administratsiyasi huzuridagi Iqtisodiy tadqiqotlar va islohotlar markazi matbuot xizmati ma’lum qilmoqda.

Xabarda aytilishicha, AQShning Pensilvaniya Universiteti yetakchi ilmiy markazlarning “Global Go To Think Tank Index Report 2019” reytingini taqdim etdi.

Markaziy Osiyodagi eng yaxshi ilmiy markazlar reytingida O‘zbekiston Respublikasi Prezidenti Administratsiyasi huzuridagi Iqtisodiy tadqiqotlar va islohotlar markazi (ITIM) Markaziy Osiyodagi eng yaxshi 63 tadqiqot va tahlil institutlari orasida 10-o‘rinni egalladi. O‘tgan yilga nisbatan bir pog‘ona yuqorilagan ITIM, 2016-yilga nisbatan uch pog‘ona yuqoriga ko‘tarildi.

2020-yil reytingiga ko‘ra, O‘zbekistondagi yana bir nechta tahlil markazlari kiritilgan. Ular orasida 26-o‘rinni egallab turgan Strategik va mintaqalararo tadqiqotlar instituti (ISMI) va 33-o‘rindagi “Tahlil” Ijtimoiy tadqiqotlar markazi mavjud.

Reyting mualliflari O‘zbekistonda 12 ta ilmiy markazlar mavjud deb hisoblashadi. Shu bilan birga, hisobotda qayd etilishicha, Qozog‘istonda - 31 ta, Qirg‘izistonda - 28 ta, Tojikistonda - 7 ta ilmiy-tahliliy markazlar mavjud. Turkmaniston ushbu reytingga kiritilmagan.

Mutaxassislar tahlil markazlari va fuqarolik jamiyati dasturi doirasida 2008-yildan beri dunyoning ilmiy-tahliliy markazlarining yillik reytingi “Global Go To Think Tank Index Report” e’lon qilindi. Hisobot siyosiy institutlar va jamoalarning mintaqaviy va global tarmoqlarini yaratishga hissa qo‘shadi. Bu ijtimoiy hayotning turli sohalarida siyosiy harakatlarning samaradorligini oshiradi. Shuningdek, butun dunyo bo‘ylab demokratik institutlar va fuqarolik jamiyatini mustahkamlashga xizmat qiladi.

Ma’lumot uchun: Iqtisodiy tadqiqotlar markazi o‘tgan yilning oktyabr oyida tashkil topganligining yigirma yilligi munosabati bilan Iqtisodiy tadqiqotlar va islohotlar markaziga aylantirildi. Shu bilan birga, yangi maqsadlar va vazifalar tasdiqlandi. Ularga rivojlangan xorijiy davlatlarda muvaffaqiyatli sinab ko‘rilgan tajribalarni asosida tahliliy va amaliy tadqiqotlar o‘tkazish, ijtimoiy-iqtisodiy islohotlarni chuqurlashtirish bo‘yicha strategik yo‘nalishlar bo‘yicha takliflar, jumladan, iqtisodiy boshqaruvni takomillashtirish, moliya, biznes va ijtimoiy sohani rivojlantirish kabilar kiradi.