Slovakiyaning “Finančné Noviny” gazetasida “O‘zbekiston xorijiy investorlar uchun jozibador makon hisoblanadi” sarlavhasi ostida maqola e’lon qilindi.

Maqolada O‘zbekiston so‘nggi yillarda jadal iqtisodiy islohotlar olib borib, chet ellik investorlar uchun jozibador mamlakatga aylanayotganligi haqida so‘z boradi.

“Davlat korxonalarining xususiylashtirilishi, biznes ro‘yxatidan o‘tkazish jarayonlarining soddalashtirilishi va raqamlashtirish orqali byurokratiyaning kamaytirilishi, mamlakatning bozor iqtisodiyotiga o‘tishga bo‘lgan qat’iy intilishini namoyon etmoqda. Bu orqali 2017-yildan beri 120 milliard dollarlik sarmoya jalb qilindi” – deyiladi maqolada.

O‘zbekiston infratuzilmani zamonaviylashtirishga katta e’tibor bermoqda — transport tarmoqlari, qayta tiklanuvchi energiya manbalari va raqamli infratuzilma jadal rivojlanmoqda. 5G texnologiyasi va yuqori tezlikdagi internet mamlakat bo‘ylab keng qamrovli bo‘lib, biznes faoliyati uchun qulay sharoit yaratilgan.

Shu bilan birga, inson kapitaliga ham jiddiy sarmoya kiritilmoqda — xususiy OTM va texnikumlar soni ko‘paymoqda, yosh mutaxassislar yetishtirilmoqda.

Hukumat investitsiya muhitini yaxshilashga qaratilgan islohotlarni davom ettirmoqda, soliq va bojxona imtiyozlari, mulk huquqini himoya qilish kafolatlari va maxsus iqtisodiy zonalar orqali investorlarni jalb etmoqda. Xalqaro kompaniyalar — Masdar, ACWA Power, Linde va boshqalarning mamlakatda faoliyat yuritishi O‘zbekistonning xalqaro miqyosdagi investitsiyaviy jozibadorligini yanada oshirmoqda.

• Investitsiya
• Iqtisodiyot
• Turizm
• slovakiya