Hech o‘ylab ko‘rganmisiz, nima uchun aksariyat insonlar soatni chap qo‘liga taqadi? Bu savol ko‘pchilikda soatni o‘ngaqaylar chap qo‘liga, chapaqaylar esa o‘ng qo‘liga taqadi-da, degan javobni paydo qiladi. Xo‘sh, nima uchun? Chunki shunday taqish insonning o‘ziga qulaylik yaratadi. Aslida, javob ko‘pchilik o‘ziga qulaylik yaratish va nisbatan kam ishlatiladigan qo‘liga soat taqishdan iborat. Nima, hammasi shunday osonmi?

Ilk qo‘l soatlari ayollarga moslab chiqarilgan

Dastlab qo‘l soatlari zargarlik buyumlariga tenglashtirilgan. Chunki, ular bilaguzukli shaklda bo‘lgan va ayollarning sevimli taqinchog‘iga aylangan. Erkaklar soat taqishni qanchalik istashmasin, o‘zlarini bu kabi taqinchoqlar bilan “bezashni” o‘ziga ep ko‘rishmagan. 

Va nihoyat, fransiyalik zargar Lui Kartye erkaklar istagini amalga oshirdi va erkaklar uchun ilk soatni yaratdi. Zargar qandaydir soatga xos revolyutsiya yaratishni maqsad qilmagan, bor-yo‘g‘i yaqin do‘stining buyurtmasini bajargan edi. Luining uchuvchi do‘sti Alberto Santos Dyumon samolyot shturvalidan qo‘l uzishni talab etmaydigan soat yaratish haqida buyurtma bergan edi. 1904-yili mana shunday erkaklar qo‘l soati “dunyoga keldi” va ular Birinchi jahon urishi vaqtida ofitserlar orasida tez mashhurlikka erishdi.

Avvaliga soatni chap qo‘lga taqish ko‘nikmasi shakllangan

Qo‘l soatlari hamma ishda qo‘llanila boshladi. Ishchilar shikastlanmaslik uchun soatni chap qo‘lga taqishga odatlanishdi. Chunki ko‘pchilik soatning yon murvati uning o‘ng tomonida joylashgan edi. Shu-shu qo‘l soatlarini chap qo‘lga taqish “an’anasi” paydo bo‘ldi.
Endi shakllanib ulgurgan soatni taqish “an’anasidan” chetlashib, ayollar va erkaklar soatni qaysi qo‘lda taqishlari kerakligiga to‘xtalamiz.

Soatni istagan qo‘lingizga taqishingiz mumkin, chunki…

Aslida, soatni qaysi qo‘lga taqish kerak, degan savolni berish noo‘rin. Odamlar soatni o‘ziga qulay holatda taqishlari kerak. Eng optimal yechim shunday! 
•  Psixologlarning ta’kidlashicha, chap qo‘liga soat taquvchilar o‘tmishni qo‘yib yubora olmaydigan, hozir va kelajakda yashashni bilmaydiganlar ekan. Soatni o‘ng qo‘lga taqadiganlar esa maqsad sari harakatlanuvchi insonni yaratadi. Ular kelajak sari ishonch bilan qadam tashlaydi. 
•  Qadimgi Xitoyning “Fukuriya” ilmiga ko‘ra, inson bilagida biologik faol nuqtalar – Chi, Sun  va Guan joylashgan. Erkaklarda ushbu nuqtalardan biri o‘ng qo‘lda, pulsga yaqin yerda joylashgan va u yurak ishiga javob beradi. O‘ng qo‘ldagi soatning ushbu nuqtaga ta’sir etishi salomatlik bilan bog‘liq jiddiy o‘zgarishlar olib kelishi mumkin ekan.
    
Mashhurlar ham soatni o‘ng qo‘liga taqishadi

O‘ng qo‘lga taqilgan soat ijodiy insonning belgisi bo‘lishi mumkin. Rassomlar, shoir va musiqachilarning ko‘pchiligi soatni o‘ng qo‘liga taqishgan. Mashhur amerikalik aktyor va aktrisalar – Juliya Roberts, Bryus Uillis, Sheron Stoun, rossiyalik siyosatchi Kseniya Sobchak, jurnalist, boshlovchi Tina Kandelaki kabi bir qator mashhurlar ham soatni o‘ng qo‘liga taqishadi.

Hatto Prezident ham soatni o‘ng qo‘liga taqadi
Qaysi Prezident, deb qiziqyapsizmi? Rossiya Federatsiyasi Prezidenti Vladimir Putin va uning matbuot kotibi Dmitriy Peskov soatni o‘ng qo‘lida taqib yurar ekan. Belarus rahbari Lukashenkoning ham soatni o‘ng qo‘liga taqishini payqashgan ekan.

Barchasi insonga qulaylik yaratish uchun
•   Har yili 13-avgust xalqaro chapaqaylar kuni sifatida nishonlanadi. Hozirgi mavjud ma’lumotlarga ko‘ra, chapaqaylar yer yuzining 8 – 15 foizini tashkil qiladi. Chapaqaylar hayotini yengillatishga soat ishlab chiqaruvchilari ayniqsa, harakat qilishmoqda. Ular bir chap qo‘lning o‘zi bilangina boshqarish mumkin bo‘lgan soat modellarini ishlab chiqarishga urinishmoqda. Bunday soatlarning murvati chap tomonda joylashadi. Quyida Shveysariyaning mashhur brendlarining ushbu ko‘rinishdagi soatlari taqdim etiladi.

Xulosa

Yaxshi hamki, soatni taqishning muayyan bir qoidasi mavjud emas. Ajoyib qo‘l soatlarini har kim qaysi qo‘lga taqishni istaganicha taqaveradi.  Axir, ushbu aksessuar turi insonning individualligini ko‘rsatish uchun yaratilgan!