Kecha, 1-may kuni Jahon sog‘liqni saqlash tashkiloti (JSST) ekspertlar guruhi Germaniyaning Frankfurt shahridan Tojikistonga “Somon Air” aviakompaniyasi samolyotida uchib ketdi.

Ta’kidlanishicha, bortda Germaniya chegaralari yopilgani sababli qolib ketgan Tojikiston fuqarolari ham bor. 

Shuningdek, JSSTning Yevropa byurosi matbuot xizmati ham ekspertlar guruhining Tojikistonga uchib ketganini tasdiqlagan.
 
JSST Yevropa byurosi vakili Dorit Nitzan guruh Tojikistonga yetib borgach, mamlakat rasmiy tuzilmalari bilan yonma-yon ishlashini aytib o‘tgan.
 
Avvalroq JSST ekspertlari Tojikistondagi shaharlar, tibbiyot muassasalari va muhim obyektlarga tashrif buyurishi haqida xabar berilgan edi.
 
30-aprel kuni koronavirus pandemiyasining oldini olish bo‘yicha Respublika shtab-kvartirasi Tojikistonda COVID-19 koronavirus infeksiyasi aniqlanganligini rasman e’lon qildi.
 
Sog‘liqni saqlash vazirligining ma’lumotlariga ko‘ra, 29-aprel kuni mamlakatda koronavirusga chalinish bilan bog‘liq 15 ta holat qayd etilgan.