2020/2021 o‘quv yilida oliy ta’lim muassasalarining bakalavriatiga o‘qishga kirish uchun o‘tkazilgan test sinovlarining yakuniy natijalari tana harorati yuqori bo‘lgan va koronavirusga chalingan abituriyentlar uchun qo‘shimcha test sinovlari bo‘lib o‘tganidan so‘ng Nizom bo‘yicha 7 kun ichida e’lon qilinadi.

Bu haqda Davlat test markazi direktori o‘rinbosari Sardor Rajabov ma’lum qildi.

–  Oliy ta’lim muassasalarining bakalavriatiga o‘qishga kirish uchun o‘tkazilgan test sinovlarining yakuniy natijalari qachon e’lon qilinishi haqida ko‘plab savollar kelib tushmoqda. Asosiy savol mandatni e’lon qilishda, keyingi bosqichda test sinovlarida ishtirok etadigan abituriyentlarni kutish shartmi, mazmunida bo‘lmoqda.

Biz tartib bo‘yicha OTMlar tomonidan e’lon qilingan kvotalar – qabul rejalari bo‘yicha mandatni e’lon qilishimiz kerak. To‘g‘risi, 2-bosqichda test topshiradigan abituriyentlar (tana harorati yuqori bo‘lgan va koronavirusga chalingan)ning mandatini ajratib berolmadik. Ya’ni, bunda biz ajratilgan kvotani qay tartibda ikkiga bo‘lish kerakligi haqida aniq mexanizmga ega emasmiz. Shu bois ham 2-bosqich test sinovlarini kutishga qaror qildi. Shunday qilib, joriy yil 23-avgust kuni bo‘lib o‘tadigan test sinovidan so‘ng, Nizom bo‘yicha 7 kun ichida OTMlarning bakalavriatiga o‘qishga kirish uchun o‘tkazilgan test sinovlarining yakuniy natijalari ishlab chiqiladi va Davlat komissiyasiga taqdim etiladi.