“Qamchiq” dovoni hududidan o‘tuvchi avtomobil yo‘li atrofida qor qatlami yig‘iladigan joylar holati mustahkam emasligi va qor ko‘chishi xavfi mavjudligi sabab bugun – 21-dekabr kuni dovon yo‘li avtomobillar uchun yopildi.

Gidrometeoroligiya xizmati markazining bergan ma’lumotiga ko‘ra, bugun, 2019-yil 21-dekabr kuni A-373 “Toshkent – O‘sh” avtomobil yo‘lida qor ko‘chkisi xavfi mavjud bo‘lganligi bois, “Qamchiq” dovoni Favqulodda vaziyatlar vazirligi (FVV) va Ichki ishlar vazirligi Yo‘l harakati xavfsizligi bosh boshqarmasi (IIV YHXBB)ning kuch va vositalari tomonidan avtotransport vositalarining harakati vaqtinchalik to‘xtatilgan. 

FVV ma’lumotiga ko‘ra, Toshkent viloyatining Ohangaron va Angren shaharlari hamda Namangan viloyatining Pop tumanida avtotransport haydovchilari va yo‘lovchilarni qabul qilish bo‘yicha barcha zarur chora-tadbirlar amalga oshirilmoqda. 

Shuningdek, “Qamchiq” dovonidan o‘tishga ulgurmagan avtotransport haydovchilari va yo‘lovchilarni Toshkent viloyatining Ohangaron va Angren shaharlari hamda Namangan viloyatining Pop tumanidagi mavjud umumovqatlanish shoxobchalariga joylashtirish ishlari amalga oshirilmoqda. Ular uchun barcha sharoitlar (issiq ovqat, ichimlik suvi, dam olish joylari) yaratilgan. 

“Qamchiq” dovonida qor qatlami yig‘iladigan joylar holati mustahkam emas, qor ko‘chishi xavfi mavjud”, deyiladi xabar so‘ngida. 
Eslatib o‘tamiz, avvalroq Gidrometeoroligiya xizmati markazitomonidan 19-dekabrdan 23-dekabrgacha O‘zbekiston tog‘li hududlarida ko‘chki xavfi e’lon qilingan edi.