Zamonaviy shahar aholisi kitob o‘qishga umuman vaqti yo‘qligidan noliydi. Ammo bu shunchaki xohish masalasi. Qanchalik band bo‘lmasin, sayyoramizning eng boy odamlarida ham o‘qish uchun vaqt bor. Ular asosan “non-fikshn” (fantastika bo‘lmagan) asarlarni tanlashadi, biroq kutubxonalarida klassika va ilmiy fantastika uchun ham joy bor. Quyida Bill Geyts, Mark Sukerberk, Jeff Bezos, Richard Brenson va Ilon Maskning sevimli kitoblari bilan tanishishingiz mumkin. 

Bill Geyts

Microsoft yaratruvchisi maktab davrida tabiatshunoslik va ingliz tili darslarini ko‘p qoldirgan, matematika va fizikani ko‘pqor ma’qul ko‘rgan. Kompaniya rahbarligidan ketganiga 10 yil o‘tdi va hozir uning kitob o‘qishga vaqti bor. 
Geyts hatto o‘z blogiga kitoblar haqidagi taqrizlarini joylashtiradi va mualliflarni suhbatga chorlaydi. Shunday taqrizlardan birida u kuzatuvchilariga do‘sti, Garvard professori psixolog Stiven Pinkerning “Bugungi ma’rifat” (“Enlightenment Now: The Case for Reason, Science, Humanism and Progress”, Steven Pinker) kitobini tavsiya qilgan. Unda ratsionalizm, pozitivizm va optimizm kabilar haqida so‘z yuritiladi. Geytsning o‘zi 90-yillarda “Kelajakka yo‘l” va “Fikr tezligidagi biznes” deb nomlangan kitoblar yozgan. Geytsning shaxsiy kutubxonasi shiftiga Frensis Skott Fitsjeraldning “Buyuk Getsbi” asaridan olingan iqtiboslar yozilgan. 

Jeff Bezos 

2018-yilda dunyoning eng boy odamlari ro‘yxatining peshqadami Geyts o‘z o‘rnini Amazon asoschisiga bo‘shatib bergandi. Bezos xodimlariga o‘qishni tavsiya qiladigan kitoblar ro‘yxatida kelib chiqishi yaponiyalik bo‘lgan zamonaviy britan yozuvchisi Kadzuo Isiguroning “Kunning qolgan qismi” (Kazuo Ishiguro “The Remains of the Day”) hamda Wal-Mart asoschisi Sem Uoltonning Bezosni ilhomlantirgan tarjimayi holi “Amerikada tayyorlangan: Qanday qilib Wal-Mart’ni yaratdim” kitobi, shuningdek, livanlik Nassim Talebning bashorat qilib bo‘lmaydigan hodisalar va iqtisodiy inqiroz haqidagi “Qora oqqush” (“The black swan”) kitobi bor. 

Mark Sukerberg

Sukerberg (Geyts singari) isroillik tarixchi Yuval Noa Hararining siyosiy, iqtisodiy tarix nuqtayi nazari bo‘yicha jamiyatimiz evolyutsiyasi haqida hikoya qiluvchi “Sapiens. Insoniyatning qisqacha tarixi” (“Sapiens: A Brief History of Humankind”, Yuval Noah Harari) asarini o‘qishni maslahat beradi. Bu kitobni Bill Geyts hatto kimsasiz orolga borganda o‘zi bilan olib ketadigan kitoblari ro‘yxatiga qo‘shgan. Sukerbergning ro‘yxati uning Facebook’dagi tavsiyalaridan shakllantirilgan. 2015-yilda u kuzatuvchilariga kelib chiqishi isroillik britan fizigi Devid Doychning “Cheksizlikning boshlanishi” (“The Beginning of Infinity: Explanations that Transform the World”, David Deutsch), britaniyalik ilmiy jurnalist Mett Ridlining “Ratsional optimist” (“The Rational Optimist: How Prosperity Evolves”, Matt Ridley) va Stiven Pinkerning ma’rifat va taraqqiyot orqali jamiyatdagi zo‘ravonlik midorini kamaytirish haqidagi “Bizdagi eng yaxshisi” (“The Better Angels of Our Nature: Why Violence Has Declined”, Steven Pinker) kitoblarini tavsiya qilgan. 

Richard Brenson

Ovoz yozib olishdan tortib uyali aloqa, kabelli televideniye va radio, avia hamda temiryo‘l yuk tashishgacha, ekologik yoqilg‘i ishlab chiqarishdan kosmik turizmgacha 400 ga yaqin sohani birlashtiruvchi Virgin korporatsiyasi yaratuvchisi o‘zining yarim asr oldin yuzaga kela boshlagan biznes-imperiyasi haqida kitob yozgan. Butunjahon kitob kuni munosabati bilan esa eng badavlat britaniyalik tavsiya qiladigan kitoblari ro‘yxati bilan bo‘lishdi. Uning ichida klassiklar: Mark Tven, Jeyms Barri, Redyard Kipling, Jorj Oruell kabilar, shuningdek, mashhur amerikalik astrofizik Karl Saganning ilmiy-ommabop kitoblari, tadbirkor Piter Diamandisning “To‘kin-sochinlik: kelajak siz o‘ylagandan ko‘ra yaxshiroq bo‘ladi” ( “Abundance: The Future Is Better Than You Think”, Peter H. Diamandis) kitobini topish mumkin.

Ilon Mask

Tesla kompaniyasi rahbari, tadbirkor va innovator Ilon Mask “Esquire”ga bergan intervyusida undan raketa qurishni qanday o‘rganganini so‘rashganida, “Men kitob o‘qiyman” deb javob bergan. Qanchalik g‘alati tuyulmasin, u tavsiya qiladigan kitoblar bir qarashda umuman raketalar haqida emas va hech qanday aniq yo‘riqnomalar bermaydi, biroq tasavvurni va nostandart tafakkurni yaxshi rivojlantiradi. Ilon Mask fantast yozuvchilar – Tolkin, Robert Xaylayn (masalan, “Oy – qattiqqo‘l beka” – “The Moon Is a Harsh Mistress”)ni, shuningdek, ilmiy adabiyotlarni – shvetsiyalik faylasuf Nik Bostromning “Superintellekt: yo‘llar, xavflar, strategiyalar” (“Superintelligence: Paths, Dangers, Strategies”, Nick Bostrom) kitobi, amerikalik ilmiy jurnalist Jeyms Barratning “Insoniyatning so‘nggi ixtirosi” (“Our Final Invention: Artificial Intelligence and the End of the Human Era”, James Barrat) kitobini hamda Uolter Ayzekson tomonidan yozilgan Amerika Prezidenti Benjamin Franklinning tarjimayi holini tavsiya qiladi.