Bolani kitob o‘qishga o‘rgatish ko‘pchilik ota-onalarning istagi. Ammo buni qanday qilish borasida ko‘plab savollar mavjud. Shu jumladan, bolaga qaysi yoshda qanday kitob bergan maqul? Necha yoshidan kitobga o‘rgatish kerak?

Go‘dakligidayoq…

O‘qishga nisbatan muhabbatni bola hayotining ilk oylaridanoq paydo qilish mumkin. U buyumlarni ushlashni o‘rganishi bilanoq (to‘rt oydan keyin), unga maxsus rivojlantiruvchi kitoblar olib bersa bo‘ladi.

Bunday kitoblar klyonkadan, matodan applikatsiyalar ko‘rinishida tayyorlanishi mumkin. Bolakay ularni ushlab ko‘rib, zavqlanadi.

1-3 yosh

Ovoz chiqarib o‘qib berish uchun yirik suratli katta kitoblarni tanlang. Kitob varaqlari mustahkam kartondan bo‘lsin – shunda bola uni yirtolmaydi va g‘ajimaydi.

Bolaga asosan suratlar qiziqligi uchun kam matnli, yirik suratli kitoblarni tanlang. Suratlar mayda detalli bo‘lmasligiga e’tibor qarating. Bola uzun matnlarni yaxshi idrok qilolmaydi, shuning uchun qisqa ertaklar, she’rlar o‘qib bergan maqul.

4-6 yosh

4 yoshli bolalarga tabiat va hayvonlar haqidagi ertaklar qiziq. Albatta, sifatli suratlari bo‘lsa. Bu yoshdagi bolalar kitob sahifalarini oson varaqlay olishi va kitobni qulay ushlashi uchun, tikilishi yumshoq bo‘lishi lozim.

4-5 yoshlardagi bolada atrof-olam haqida ko‘proq bilishga intilish kuchli bo‘ladi. Unga tushunarli bo‘lgan qiziqarli ensiklopediyalar sotib oling. Bo‘yash yoki o‘ynash mumkin bo‘lgan kitoblar ham unga yoqishi tayin.

Bolaga ko‘proq nimalar qiziqligiga ahamiyat bering. Mashinalar qiziqtirsa, mashinalarga oid ensiklopedik kitoblar xarid qiling.

7-9 yosh

Bu yoshdagi bolalarga o‘ziga o‘xshagan bolalar haqidagi kitoblar qiziq. Jumladan, sarguzashtlar, sayohatlar, shuningdek, super-qahramonlar haqidagi kitoblar sovg‘a qiling. Bu kitoblar bolaga turli vaziyatlarda o‘zini qanday tutish, muammolarni qanday hal qilishni o‘rgatadi.

10-12 yosh

Bu yoshdagi bolalar mustaqil bo‘lishga intiladi va nima o‘qishni o‘zi tanlay oladi. O‘zingiz o‘qigan kitoblar haqida gapirib bering, birga hikoyalar o‘qing. Kitoblarga oid kundalik, hatto, blog ham yuritishingiz mumkin. Bu uni ruhlantirishi tayin.

Farzandingizga kitoblar olamini ochar ekansiz, uning uchun eng yaxshi ishni qilgan bo‘lasiz!

Sarvinoz Omonova