“Mening fikrim” jamoaviy murojaatlar portalida jismoniy va yuridik shaxslardan mobil qurilmalarning IMEI raqamlarini ro‘yxatga olishda undiriladigan to‘lovlarni bekor qilish taklifi berildi.

“Jismoniy va yuridik shaxslardan mobil qurilmalarning IMEI raqamlarini ro‘yxatga olish uchun aholidan undiriladigan to‘lovlarni bekor qilish va ro‘yxatga olishni yanada soddalashtirish tartibi joriy etilishini so‘rayman. Chunki, hozirgi globallashuv davrida aholini qo‘llab-quvvatlash, ortiqcha to‘lov va ovoragarchiliklarni bartaraf etish muhim deb hisoblayman”, deydi taklif muallifi.

Eslatib o‘tamiz, 2019-yil 17-sentabrda “O‘zbekiston Respublikasi hududida foydalanilayotgan, sotish yoki shaxsiy foydalanish uchun olib kiriladigan va ishlab chiqariladigan mobil qurilmalarni ro‘yxatga olish tartibi to‘g‘risidagi nizomni tasdiqlash haqida”gi Hukumat qarori qabul qilingan edi.

Unga ko‘ra, 2019-yil 1-noyabrdan IMEI kodini ro‘yxatdan o‘tkazish SMS/USSD so‘rovlar, UZIMEI tizimi operatori va boshqa usullar orqali amalga oshirilgan va 1-dekabrgacha mazkur amaliyot bepul bo‘lgan edi.

2019-yil 1-dekabrdan esa IMEI kodi ro‘yxatdan o‘tkazish uchun jismoniy shaxslar bugungi kun hisobi bilan 44600 so‘m to‘lashi, agar 30 kun davomida registratsiya qilinmasa, 44600 emas, 55750 so‘m to‘lashga to‘g‘ri kelishi haqidagi tartiblar joriy qilingan edi.

Yuqoridagi mazkur tartibni bekor qilish haqidagi taklif hozirga qadar 5 mingdan ortiq ovoz to‘pladi (17.02.2020-y. soat 11:30 holatiga ko‘ra).

Taklif muallifi yuqoridagi fikrlarini inobatga olgan holda IMEI kodlarini ro‘yxatga olishda to‘lovlarni bekor qilinishini so‘raydi.

“Albatta bepul qilish kerak. O‘zi xalq orasida “davlat qanday pul qilishni bilib oldi” degan gaplar ko‘payyapti”, deydi petitsiya ostiga qoldirilgan post egalaridan biri.

Taklifni qo‘llab-quvvatlovchi yana bir internet foydalanuvchisi, jumladan shunday deydi:
– O‘z mehnatim evaziga sotib olgan telefonim va sim kartamni yana qo‘shimcha to‘lov evaziga ro‘yxatdan o‘tkazish bu nohaqlik, men bunga qarshiman. Qonun chiqaruvchilar va yangi qonun taklifini kirituvchilar yumshoq kreslongizda o‘tirib olib xalqni qonini ichmanglar. Xavfsizlikni o‘ylagan mutasaddilar esa xavfsizlik xalqning haqidan ta’minlanmasligi kerakligini o‘ylab ko‘rishsa yaxshi bo‘lardi.