Dunyoning eng serdaromad studiyalarini o‘z qanoti ostiga olgan Disney kompaniyasi kinematografiya maydonida haqiqiy monopoliyachi bo‘lish uchun barcha imkoniyatga ega. Marvel, Lucasfilm va Pixarning eng yaxshi mutaxassislariga ega bo‘lgan kompaniya filmlari har doim kino ixlosmandlarining e'tirof va olqishlariga sazovor bo‘lib kelgan.

Yaqinda bo‘lib o‘tgan D23 konvensiyasida Disney vakillari bo‘lajak filmlar anonsini e'lon qildilar. Yaqin ikki yil ichida biz quyidagi filmlarni tomosha qilishimiz mumkin bo‘ladi.

Samoviy urushlar: Kuchning uyg‘onishi

Jahon premerasi: 2015 yil 18 dekabr 

Yilning eng ko‘p muhokama qilingan filmi premerasiga juda ham oz muddat qoldi. Ishqibozlar orziqib kutishmoqda — kimdir Disney o‘z va'dasi ustidan chiqishiga va fantastik galaktikaga oid filmni qoyilmaqom qilib ishlashiga umid qilayotgan bo‘lsa, yana kimdir buning aksini kutmoqda. D23dagi qisqa namoyishga qaraganda esa, Disney mazkur premeraning misli ko‘rilmagan tarzda bo‘lishiga harakat qilmoqda.

Doktor Streynj

Jahon premerasi: 2016 yil 26 oktabr

Benedikt Kamberbetch Marvelning «Doktor Streynj» filmini tanishtirdi. Qudratli afsungarga aylangan iste'dodli jarroh haqida hikoya qiluvchi bu film sanoqsiz qasoskorlar, spaydermenlar va boshqa tanish superqahramonlardan zerikkan kino ishqibozlari uchun ajoyib sovg‘a bo‘ladi.

Samoviy urushlar: Quvg‘indi

Jahon premerasi: 2016 yil 16 dekabr 

Nihoyat mazkur serial ishqibozlari uzoq kutilgan «Samoviy urushlar»ning yakunlovchi qismidagi aktyorlar tarkibi bilan tanishishga muvaffaq bo‘ldilar. Film voqealari «Yangi umid»dan bir necha yil oldin yuz beradi, bosh qahramonlar esa Ajal yulduzining rejalarini o‘g‘irlashga uringan bir guruh isyonchilar bo‘lishadi. Film rejissyori esa bizga so‘nggi «Godzilla»ni taqdim etgan Garet Edvardsdir.

Alisa Ko‘zguorti mamlakatida 

Jahon premerasi: 2016 yil 27 may 

Shunisi aniqki, kompaniya Bertonning muvaffaqiyatli «Alisa»sini e'tibordan chetda qoldira olmasdi. Sikvelda original filmdagi barcha yulduzlar qatnashishadi, bosh qahramon esa Telba shlyapachini qutqarish uchun vaqt bo‘ylab sayohatga chiqadi.  

Sohibjamol va Maxluq 

Jahon premerasi: 2017 yil mart  

Va albatta, o‘lmas klassikani yana bir bor namoyish etmaslikning ham iloji yo‘q. Bir yarim yildan so‘ng jahon kino ahli «Sohibjamol va Maxluq»ning navbatdagi talqinini tomosha qilishi mumkin. Bosh rollarda Emma Uotson va Yuen MakGregor ishtirok etishadi.

Galaktika qo‘riqchilari

Jahon premerasi: 2017 yil 5 may

Studiyadagilar «Galaktika qo‘riqchilari» borasidagi rejalarini ham e'lon qilishdi. Film haqida ma'lumot judayam kam — faqatgina uning ekranlarga 2017 yil mayda chiqishi va “Guardians of the Galaxy Vol. 2” deb nomlanishi ma'lum xolos.

O‘yinchoqlar tarixi 4

Jahon premerasi: 2017 yil 16 iyun

Bu yil Pixar studiyasi ilk «O‘yinchoqlar tarixi»ning ekran yuzini ko‘rganining 20 yilligini nishonlaydi. Kompaniya mazkur franshizaning navbatdagi qismi suratga olinishini e'lon qildi. Yangi qismda Vudi va Bo Pipning o‘zaro munosabatlari haqida hikoya qilinadi.

Karib dengizi qaroqchilari: murdalar ertak aytmaydilar

Jahon premerasi: 2017 yil 7 iyul 

Barcha sevib tomosha qiladigan qaroqchilar haqidagi filmning yangi qismi haqida shaxsan kapitan Jyek Chumchuqning o‘zi e'lon qildi. Mazkur sikvelda tomoshabinlar yana bir bosh qahramon Orlando Blumning qaytishiga ham guvoh bo‘lishadi.