Joriy yilning 1-iyunidan boshlab, ijro ishi yuritishni qo‘zg‘atish ijro hujjati kelib tushgan vaqtdan boshlab bir ish kuni ichida ijro ishi qo‘zg‘atilishi yo‘lga qo‘yildi. Muqaddam ijro hujjati 3 kun ichida qo‘zg‘atilardi.
Bu haqida Majburiy ijro byurosining Axborot va ommaviy kommunikatsiyalar agentligida o‘tkazilgan tadbirida aytib o‘tildi.

Ijro harakatlari kechiktirilishi kamaydi

Shuningdek, anjumanda “Sud hujjatlari va boshqa organlar hujjatlarini ijro etish samaradorligini yanada oshirish chora-tadbirlari to‘g‘risida”gi qarorning mazmuni tushuntirildi.
Avval ijro harakatlari bir necha marta kechiktirilishi mumkinligi qonunchilikda ko‘rsatilmagan edi va bu ijro hujjatlarining ko‘p bora to‘xtalib, undiruvchi tomonlarning noroziligiga sabab bo‘lardi.
Endilikda esa, ijro harakatlari ko‘pi bilan 2 marta kechiktirilishi mumkin.

Ijro ishlari 15 ish kunida ko‘rib chiqiladi

Qaror bilan ijro ishlariga ishtirok etishi lozim bo‘lgan mutaxassis davlat ijrochisi tayinlagan ish bilan tanishgan kundan boshlab, 15 ish kuni ichida yozma xulosa taqdim etishga majbur.
Avvallari ijro harakatlarida mutaxassis ishtirok etishi lozim bo‘lgan ijro harakatlari – ekspert, mutaxassisning xulosasini ololmasligi sababli cho‘zilib ketardi. Bu holat tomonlarning manfaatini ishonchli himoya qilishga halaqit berardi.

Avtomatlashtirilgan taqsimlash tartibi joriy etildi

Yana bir yangilik, hozirga qadar ijro hujjatlari davlat ijrochilari o‘rtasida bo‘lim boshlig‘i tomonidan taqsimlangan. Biroq, odatiy taqsimlash tizimi davlat ijrochilarining ish hajmini nomutanosib belgilanishiga, ayrim hollarda ishlarni taqsimlashda guruhbozlik va tanish-bilishchilikka sharoit yaratgan. 

Shuning uchun ham ijro hujjatlarini avtomatlashtirilgan tizim orqali davlat ijrochilari o‘rtasida avtomatlashtirilgan taqsimlash tartibi joriy etilmoqda.

Sud qarori SMS orqali yuboriladi

1-oktabrdan boshlab, bu jarayon Toshkent shahrining Yakkasaroy tumani va Navoiy shahridagi Majburiy ijro byurosi bo‘limlarida eksperimental tariqasida yo‘l qo‘yildi.

Qarorga ko‘ra, fuqarolar sud qarorlari ijrosini bilish uchun tuman markaziga Majburiy ijro byurosining tegishli bo‘limi yoki davlat ijrochisining huzuriga bormaydi. Sudning qarori ijrosi fuqarolarga elektron pochta yoki mobil aloqa vositalari orqali qisqa xabar (SMS) ko‘rinishida yo‘llanadi.

Xabardor.uz