Tejamkorlik yaxshi. Bu ertangi kun uchun himoya yostiqchasiday gap. Aksariyat taniqli millionerlar ham tejamkor ekanligi haqida ko‘p eshitamiz. Ammo shunday narsalar borki, ular uchun pul tejab, foyda ko‘rmaysiz, aksincha zarar ko‘rasiz. Ular nimalar?

1. Salomatlik

Salomatlikka sarmoya kiritish – hayotingizning hamma sohalariga sarmoya kiritishdir. Sog‘ligingiz yomon bo‘lsa, ishda muvaffaqiyatga erisholmaysiz, karyera pillapoyalaridan tez ko‘tarila olmaysiz, munosabatlarda o‘zingizni baxtli his qilmaysiz va farzandlaringizga vaqt ajratolmaysiz. Bu bandga tanangizga g‘amxo‘rlik qilish va uni yaxshi jismoniy holatda ushlab turish ham kiradi. Qimmatbaho kosmetik vositalar shart emas. Mahsulot narxi qimmat bo‘lsa – bu sifatli degani emas. Ammo yaxshi tibbiy muolaja arzon bo‘lmasligini hisobga oling. 

2. Oziqlanish

Oziqlanishni salomatlik tarkibiga kiritsa bo‘ladi. Ammo kundalik hayotimizda ovqat muhim o‘rin tutgani bois, uni alohida band qilishni lozim topdik. 

Shuni yodda tutish kerakki, oziqlanish ta’m ehtiyojlarimizni qondirishgina emas, balki organizmga kerakli moddalar va energiyani berishdir. Aslida, sog‘lom ovqatlanish – qimmat, degan gap noto‘g‘ri fikr. Biroq, shunday foydali mahsulotlar borki, ular anchagina qimmat bo‘ladi. Ular uchun pul tejasangiz arziydi. 

3. Dam olish

Yaxshi va to‘laqonli hordiq chiqarish, albatta, kerak. Organizm dam olar ekan, u kuchini tiklab oladi. Ba’zida yangi ish haftasidan oldin quvvat to‘plab olish maqsadida sayohatga pul sarflash ham foydalidir. 

4. Sayohatlar

Sayohat – dam olishning bir turi. Ular bizga yangi bilimlar beradi. Sayohat qilar ekansiz, qiziqarli va ko‘p qirrali shaxsga aylanasiz. Bu esa nafaqat do‘stlaringiz bilan taassurot almashish, balki ishingiz uchun ham foydalidir. Qaytganingizda, o‘zingizni butunlay boshqa odam kabi his qilasiz. Avvalgi vaziyatlarga munosabatingiz o‘zgaradi, jamiyatda o‘zingizni boshqacha pozitsiyada tuta boshlaysiz. Bu esa, sizga raqobatbardoshlik xususiyatini taqdim etadi. 

5. Uzoq vaqt kiyiladigan kiyim va poyabzal

Bitta sifatli buyum o‘rniga beshta sifatsizini olishingiz ham mumkin. Natijada, baribir o‘sha miqdordagi pulni sarflaysiz. Toza va sifatli kiyim – har qanday jamiyatda mavqega ega bo‘lish uchun zarur vosita. Yomon oyoq kiyim, hatto sog‘ligingizga ham zarar yetkazishi mumkin. Chunki, qanday yurishimiz va qadam bosishimiz umurtqamiz hamda qomatimizda aks etadi. 

6. Hayot sifatingizni yaxshilovchi hamma narsa

Kitoblar, ta’lim, treninglar, malaka oshirish, elektron gadjetlar, fitness bilan shug‘ullanish va boshqa ko‘plab narsalar yaxshi hayot kechirishingizga yordam beradi. Shunday ekan, bularga tejamang. Kim biladi, balki bir kunlik tadbir yoki trening sizga yangi imkoniyatlar eshigini ochar, ehtimol ma’lum bir maqsadingizga yaqinlashtirar. 

7. Qulaylik va xavfsizlik

Yarim kechasi uyga qaytayotganingizda taksi chaqirish kerakmi yoki pulni tejash kerakmi?, deb ikkilansangiz, xavfsizligingizni ustun deb biling. Qulaylik bu sizga sifatli uyqu beruvchi yostiq, hayotdan lazzatlanishingizga sabab bo‘ladigan istalgan narsa, nimadandir voz kechganingiz uchun his qiladigan asabiylik emas. 

8. O‘zingiz uchun sovg‘alar

Afsuski, ko‘pchilik odamlar o‘zi uchun pul sarflolmaydi. Agar o‘zingizga pul sarflashni xarajat deb hisoblasangiz, bu holatni o‘zgartirish vaqti keldi. Nimanidir o‘zingiz uchun sotib olar ekansiz, u rostdan ham kerakmi?, hayotingizni yaxshilaydimi?, aniqlang. Ehtimol, kayfiyatingizni ko‘taruvchi sharf sotib olarsiz. Ehtimol, fotokamera olib, orzuyingizni amalga oshirarsiz.