Ayni vaqtda Prezident raisligida chet tillarini o‘qitishni takomillashtirishga bag‘ishlangan videoselektor o‘tkazilmoqda.

Yig‘ilishda chet tillarini o‘qitish bo‘yicha joylardagi haqiqiy ahvol qoniqarli emasligi qayd etildi.
– Chet tillarini o‘qitishga urg‘uni boshqacha qo‘yish kerak. Katta korxonalar qurilyapti, texnologiyalar o‘rnatilyapti. Xorijiy tilni mukammal bilish zarurati yuzaga kelyapti. Barcha hududlar rahbarlari, ta’limga aloqador tashkilotlar o‘zbek tiliga bo‘lgan e’tiborimizni chetda qoldirmay, chet tillarini o‘rgatish bo‘yicha jiddiy shug‘ullanishi kerak. Maktab, litsey, kollej va oliygoh bitiruvchilari kamida 2 ta chet tilini mukammal bilishlari shart, – dedi Prezident.

Shuningdek, keyingi 3 yil davomida maktablardagi jami 53 ming nafar chet tili o‘qituvchilari xalqaro sertifikat olishlari zarurligi ta’kidlandi.

Bundan tashqari yuqori ball olgan o‘qituvchilarga o‘qish xarajatlarining bir qismini qoplab berish tizimi yo‘lga qo‘yiladi hamda chet tillari bo‘yicha eng yaxshi ko‘rsatkichlarga erishgan maktablarni rag‘batlantirish uchun Prezident sovrini ta’sis etiladi.  

Bunda tuman (shahar) g‘olibiga 100 mln. viloyat bosqichida g‘olib bo‘lgan maktabga 200 mln. respublikada birinchilikni qo‘lga kiritgan maktabga esa 500 million so‘mgacha mukofot beriladi. 

Qolaversa, yig‘ilishda kelgusi yildan boshlab magistratura va doktoranturaga kiruvchilar chet tilini bilish xalqaro sertifikatiga ega bo‘lish talabi ham kiritilayotgani ta’kidlandi.