Ijtimoiy tarmoqlarda tarqalayotgan Navoiy shahrida Olimpiada chempioni bir fuqaroni urib tan jarohati yetkazganligi tasvirlangan videoxabar yuzasidan viloyat IIB rasmiy munosabat bildirdi.

Mazkur holat Navoiy viloyati IIB tomonidan o‘rganilgan. Aniqlanishicha, voqea joriy yilning 22-avgust kuni tungi soat 2:00 larda Navoiy shahar “Ziyokor” mahallasi hududida sodir etilgan bo‘lib, Karmana tumanida yashovchi 1994-yilda tug‘ilgan S.A. mazkur mahalla hududida joylashgan restoranlarning biriga o‘ziga yaqindan tanish bo‘lgan fuqarolar bilan ovqatlanish uchun borgan. Yakunda fuqaro S.A. to‘lovni amalga oshirgan va yetmay qolgan ma’lum miqdordagi pul mablag‘ini avtomashinadan olib berish uchun tashqariga chiqqan vaqtida, mazkur restoranda ishlovchi 2004-yilda tug‘ilgan fuqaro M.U. uning oldiga borib, qolgan to‘lov pulini ham amalga oshirishini so‘ragan. Spirtli ichimlik ta’sirida bo‘lgan S.A. o‘zaro og‘zaki tortishib qolib, jamiyatda yurish-turish qoidalarini qasdan mensimasdan, o‘ziga oldindan tanish bo‘lmagan fuqaro M.U.ni hech bir sabablarsiz qo‘li bilan yuz sohasiga urib, tan jarohati yetkazgan.

Surishtiruvlar davomida gumonlanuvchi fuqaro S.A. olimpiada chempioni emasligi, o‘sha kuni restoranga 1995-yilda tug‘ilgan disk uloqtirish bo‘yicha ikki karra paralimpiyada chempioni, fuqaro E.S. bilan birgalikda uning avtomashinasida borganligi, o‘zaro tortishuv kelib chiqqan jarayonda fuqaro E.S. avtomashina salonida bo‘lganligi va holatga keyinchalik aralashib, fuqaro S.A.ni tinchlantirishga harakat qilganligi hamda jabrlanuvchi fuqaroga tezkorlik bilan yordam ko‘rsatganligi ma’lum bo‘ldi.

Holat yuzasidan O‘zbekiston Respublikasi Jinoyat Kodeksining 277-moddasi 1-qismi bilan jinoyat ishi qo‘zg‘atilgan va gumonlanuvchi S.A. protsessual tartibda ushlangan. Hozirda tergov harakatlari olib borilmoqda.

• IIB
• Janjal
• Navoiy
• fuqaro