Biroz avval “Olimpiya” stadionida O‘zbekiston milliy terma jamoasi “CAFA Nations Cup-2025” musobaqasi doirasidagi Turkmanistonga qarshi bellashuvni o‘tkazdi.

2:1 hisobida yakunlangan o‘yinda vakillarimiz nihoyatda qiyin g‘alabaga erishdi. Dastavval Igor Sergeyev Ruslan Jiyanovning uzatmasidan keyin 37-daqiqada hisobni ochgan bo‘lsa, bo‘lim so‘ngida uning o‘zi penaltidan yana bir to‘p kiritib, hisobni ishonchli ko‘rinishga keltirdi.

Bellashuvning 59-daqiqasidan boshlab, terma jamoamiz bir kishi kam bo‘lib harakat qila boshladi. Farruh Sayfiyev raqib darvozaboni to‘pni ushlab olib bo‘lgandan keyin unga qarshi qo‘pol harakat qildi va hakam tomonidan to‘g‘ridan-to‘g‘ri maydondan chetlatildi.

Shundan keyin hamyurtlarimiz asosan qarshi hujumlarda o‘z omadini sinab ko‘rishga harakat qildi. Ammo turkmanistonlik futbolchilar ham mudofaada ishonchli o‘yin ko‘rsatdi.

Qarama-qarshilik yakunlanishi arafasida qo‘shnilarimiz penalti ishlab oldi va Turdiyev undan unumli foydalandi. Hisob boshqa o‘zgarmadi va yakunda termamiz qimmatli uch ochkoni qo‘lga kiritdi.

Endi keyingi turda O‘zbekiston xuddi shu stadionda Qirg‘iz Respublikasi bilan to‘qnash kelsa, Turkmaniston Ummon bilan bahs olib boradi.

• Futbol
• Sport
• Terma jamoa
• musobaqa