Bugun “O‘zekspomarkaz” milliy ko‘rgazmalar majmuasida “O‘zcharmsanoat” uyushmasi tashabbusi bilan an’anaviy “UzCharmExpo” charm, poyabzal va mo‘yna 11-xalqaro ko‘rgazma-yarmarkasi o‘z ish faoliyatini boshladi, deya xabar bermoqda Xabardor.uz muxbiri.

Tadbirni Investitsiya va tashqi savdo vaziri Sardor Umurzaqov ochib berdi.Tadbirda Xalqaro charm ishlab chiqaruvchilar kengashi kotibi Pol Pirson, International Leather maker jurnali muharriri Izabella Griffits, O‘zbekiston-Fransiya biznes klubi vitse prezidenti Patrik Stenger Rossiya poyabzal va charm ishlab chiqaruvchilari kengashi bosh direktori Aleksandra Grigoryevna ishtirok etishdi.

 Bu yil mazkur anjumanda 20 dan ortiq davlatdan 150 dan ziyod mahalliy va xorijiy kompaniya va tashkilotlar ishtirok etmoqda. Ko‘rgazma ekspozitsiyasidan 3,5 mingdan ortiq mahsulotlar namunalari joy olgan.

Qayd etilganidek, mazkur tadbir yangi hamkorlar topish va manfaatli aloqlarni yoʻlga qoʻyish uchun samarali platformaga aylandi. Anjuman har yili besh mingdan ortiq mehmonni, jumladan, charm-poyabzal, moʻyna mahsulotlari ishlab chiqaruvchi korxonalari, chet-ellarning xalqaro tashkilotlari, uyushmalari hamda federatsiyalari rahbarlarini, moda jurnali muharrirlarini jalb qilib kelmoqda.

Milliy iqtisodiyotda biznes muhitini yaxshilash va jahon moliyaviy tizimiga integratsiyalashuvni taʼminlashga qaratilgan tub islohotlar zamirida mahalliy charm-poyabzal sanoatidagi ijobiy tendensiyalar xorijiy hamkorlar va investorlarni oʻziga jalb qilmasdan qolmaydi.  Har yili koʻrgazmada ishtirok etayotgan korxonalar soni va ular tomonidan ishlab chiqarilgan mahsulotlarning keng assortimenti buning yorqin tasdigʻidir.

Mazkur koʻrgazma doirasida “Eng yaxshi milliy stend”, “Eng yaxshi xorijiy stend”, “Eng yaxshi poyabzal dizayni”, ommaviy axborot vositalari vakillari uchun esa “Eng yaxshi media mahsulot” nominatsiyalari boʻyicha tanlov tashkil etiladi.

Ko‘rgazma 16-oktabrdan 18-oktabrgacha bo‘lib o‘tadi.