Tahririyatimizga Toshkent viloyati Zangiota tumanidan murojaat kelib tushdi. Unda bayon etilishicha, tumandagi “Fayz” MFYda ikki kundan beri daraxt kesish avjiga chiqqan. 

“Kechaning o‘zida 7-8 ta daraxtni kesib tashlashdi.  Mahalla raisidan so‘rasam, chirigan daraxtlar kesilyapti. Ularning ham 6-7 metr qoldirib faqat tepasidan kesishadi deydi. Lekin bular bir boshidan, chirigan chirimaganiga qaramasdan kesishyapti. Bugun ertalab ham bitta daraxt kesishdi. U ham mutlaqo chirimagan edi. Mana hozir ham kesishmoqchi bo‘lib turibdi. Bunisini tagidan kesishmoqchi” deydi ismi ochiqlanishini istamagan fuqaro.

Xabardor.uz holatni o‘rganish va vaziyatga izoh so‘rash maqsadida O‘zbekiston Ekologik partiyasi Zangiota tumani kengashi raisi Komiljon Abdumannopov bilan bog‘landi. Uning aytishiga qaraganda, bu daraxtlarni kesishga viloyat Ekologiya va atrof-muhitni himoya qilish boshqarmasidan ruxsat olingan. Faqat 2 ta daraxt kesilgan qolgani esa butalmoqda. Daraxtlar kesilishini esa aholining o‘zlari so‘rashgan. Sababi shamolda daraxt shoxlari derazalarga urilib, aholiga noqulaylik tug‘dirayotgan ekan.

“Mahalla raisi o‘zi bizga murojaat qilgandi. Yo‘l-yo‘riq ko‘rsatdik. Yagona darchadan o‘tkazdik. Keyin viloyat Ekologiya boshqarmasiga kelishdi. Daraxt kesilishiga viloyat ruxsat berdi. Bu bo‘yicha protokol mavjud. Bu daraxtlarning faqat ikkitasi tagi bilan kesilyapti. Chunki bu daraxtlarni zararkunandalar zararlagani, chiriganligi aniqlangan. Tumanda 2 nafar ekologiya bo‘limi xodimi tepasida turibdi. Faqat ruxsat berilgan daraxtlar kesilyapti. Mahalla raisi o‘zi ham o‘sha yerda” deydi K. Abdumannopov. 

Toshkent viloyati Ekologiya va atrof-muhitni muhofaza qilish boshqarmasining tegishli xulosasiga ko‘ra, ekspertlar tomonidan joyga chiqib o‘rganilgan. O‘rganishlar natijasida 2 tup zararkunandalar ta’sirida zararlanib qurigan hamda 60 tup sog‘lom o‘sish holatidagi, shoxlari tarvaqaylab o‘sgan chinor daraxtlari mavjudligi ma’lum bo‘lgan. 

Erali NORBEKOV