Dunyoda yagona g‘ayrioddiy rangli mutant daraxtning namunasi  Qrim federal universitetining Tibbiyot akademiyasi parkida mavjud, deya yozadi Ria Novosti.

QFU biokimyo kafedrasi mudiri, biologiya fanlari doktori, professor Konstantin Efetov botanik Andrey Ena bilan birgalikda ilgari hech qachon uchramagan o‘simlikning yangi genetik navini aniqlashdi. Unga “Albina” deb nom qo‘yishdi va AQShdagi butunjahon navlari ma’lumotlar bazasiga ro‘yxatdan o‘tkazish uchun yuborishdi.

1751-yilda Xitoydan Rossiyaga daraxtning Ailant turi keltirilgandi. Bu dekorativ daraxt juda tez o‘sadi, balandligi 10-15 metrga yetadi va chiroyli bo‘lib savlat to‘kib turadi. Yaqin vaqtgacha uning faqat uchta navi ma’lum edi.

Simferopolda topilgan daraxt hali yosh, balandligi bir metrdan oshmaydi. Barglari oq naqshlar bilan ajralib turadi. Aynan mana shu o‘simlik Ailantning mutantidir. Bunday mutatsiya ilgari ma’lum emas edi, shuning uchun olimlar uning o‘ziga xos xususiyatlarini bir yil davomida o‘rganishdi.

“Bu nasldan naslga o‘tuvchi irsiy kasallikmi yoki yo‘qmi, buni aniqlash kerak edi. Buning uchun o‘simlik bir yil davomida o‘rganildi. Oq rangda turgan barglari bahorda yana o‘sha rangda paydo bo‘ldi. Shunday qilib, uning genetik mutatsiya ekanligi tasdiqlandi”, – deya Konstantin Efetov Ria Novosti agentligiga ma’lumot bergan. Unga ko‘ra, mutatsiyaning sababi ekologiya va u yangi, chiroyli dekorativ shaklning paydo bo‘lishiga olib kelgan.
“Yangi navning ranglari juda g‘ayrioddiy. To‘q yashildan tortib to oqqacha barcha mumkin bo‘lgan o‘tishlar mavjud, deydi professor Andrey Ena.

Olimlar du daraxt yangi navning ajdodiga aylanishiga umid qilishmoqda. Daraxtga “Albina” nomi qo‘yilishiga kelsak, u  lotincha “albus” so‘zidan olingan bo‘lib, “oq” degan ma’noni anglatadi.