Jinoiy va ma’muriy huquqbuzarliklar sodir etilish holatlari hamda ichki ishlar organlarining yo‘l-patrul xizmati, patrul-post xizmati, huquqbuzarliklar profilaktikasi hamda jazoni ijro etish bo‘linmalari xodimlarining harakatlarini qayd etuvchi texnik vositalardan foydalanish tartibi belgilandi.

2019-yil 25-dekabr kuni O‘zbekiston Respublikasi Ichki ishlar vazirining 444-son “Jinoiy va ma’muriy huquqbuzarliklar sodir etilish holatlari hamda o‘z zimmasiga yuklatilgan xizmat vazifalarini bajarayotgan ichki ishlar organlari xodimlarining harakatlarini qayd etuvchi texnik vositalardan foydalanish tartibi to‘g‘risidagi yo‘riqnomani tasdiqlash haqida” buyrug‘i qabul qilindi.

Mazkur buyruq bilan IIO xodimlari xizmat vazifalarini bajarish vaqtida, profilaktik tadbirlarni o‘tkazishda, shuningdek patrul avtomobillari, “Mobil markazlar”, maxsus avtotransport vositalari va maxsus vagonlar mobil videoregistratorlar bilan ta’minlanadi.

IIOning navbatchilik qismlari qoshida Monitoring guruhi tashkil qilinadi va tezkor xizmat faoliyatida bevosita IIO navbatchilik qismi boshlig‘i va smena boshlig‘i (katta inspektor-navbatchi)ga bo‘ysunadi.

Monitoring guruhi mobil videokameralarni real vaqt rejimida kuzatib borish orqali IIO yo‘l-patrul va patrul-post xizmati, huquqbuzarliklar profilaktikasi hamda jazoni ijro etish bo‘linmalari xodimlarining xizmat vaqti va joyidagi harakatlari (harakatsizligi)ni, shuningdek jamoat joylarida fuqaro va shaxslarni yurish-turishlarida jinoiy yoki ma’muriy huquqbuzarlik alomatlari mavjud holatlarni yoxud tezkor vaziyatni salbiy o‘zgarishiga olib keluvchi nostandart va shoshilinch vaziyatlarni aniqlash yoki videotahlil bergan ma’lumotlarni o‘rganib, ularga nisbatan zudlikda tegishli chora ko‘rish, og‘ir oqibatlarning oldini olish va tizimdagi nosozliklarni bartaraf etish choralarini ko‘rish hamda mazkur Yo‘riqnoma bilan belgilangan boshqa axborot-tahlil va hisobot yuritish kabi vazifalarni bajarish maqsadida faoliyat yuritadi.