Senatning Mudofaa va xavfsizlik masalalari qo‘mitasi tomonidan Monopoliyaga qarshi kurashish qo‘mitasiga yuborilgan Senator so‘roviga javob berildi.
 
Unga ko‘ra,  aviakassalarda “Uzbekistan Airways” aksiyadorlik jamiyati tomonidan mahalliy va xalqaro yo‘nalishlarda mavjud barcha tariflar haqidagi ma’lumotlar iste’molchilarga to‘liq yetkazilmagan.

Shuningdek, “Uzbekistan airways” AJ tomonidan Toshkent-Moskva bir tomonlama yo‘nalishda chiptalar “bagajsiz ekonom” sinfida 131 yevrodan 211 yevrogacha, “ekonom” sinfida 145 yevrodan 335 yevrogacha, “biznes” sinfida 642 yevrodan 862 yevrogacha etib belgilangan bo‘lsada, aviakompaniya tomonidan  arzon narxlardagi aviachiptalar sotuvga chiqarilmagan.

Bundan tashqari, o‘rganishlar davomida “Uzbekistan Airways” AJ tomonidan mahalliy yo‘nalishlar uchun belgilangan narxlar boshqa davlatlardagi narxlardan qimmatligi, xususan, “Uzbekistan Airways” AJ tomonidan belgilangan narxlar xorijiy aviakompaniyalarning narxlaridan o‘rtacha 36 foizdan 148 foizgacha yuqori ekanligi ma’lum bo‘ldi.

Misol uchun, Toshkent-Urganch (uchish vaqti 1 soat 15 minut) yo‘nalish bo‘yicha “bagajsiz ekonom” sinfidagi chipta narxi o‘rtacha 41 yevro etib belgilangan. Huddi shu xizmat Rossiya Federatsiyasida (Sankt-Peterburg-Moskva – yo‘nalishi 1 soat 30 minut) o‘rtacha 27 yevroni tashkil etadi (“Uzbekistan Airways”ning parvoz uchun belgilagan narxi 56 foizga qimmat). 

Shuningdek, “Uzbekistan Airways” AJning ushbu yo‘nalish bo‘yicha “Ekonom” sinfidagi aviachipta narxi Qozog‘istondagi aviakompaniyadagi narxlardan 40 foizga, Turkiyadagi aviakompaniya narxlaridan esa 146 foiz qimmat ekanligi aniqlandi.

Bundan tashqari, Turkiya davlatidagi ichki yo‘nalishlari bo‘yicha “ekonom” sinfidagi tariflar O‘zbekistonda qo‘llanilayotgan ichki “bagajsiz ekonom” tariflaridan o‘rtacha 42 foizga arzon ekanligi aniqlandi.

Aksilmonopoliya bu kabi aviatashish xizmatlari bozorida qimmat narxlarni ushlab turish sabablaridan biri sifatida raqobat muhiti rivojlanmaganligini ko‘rsatmoqda.

Qo‘mita misol sifatida, Toshkent – Olmaota yo‘nalishi bo‘yicha haftasiga 7 marta muntazam reyslar mavjudligiga qaramay faqat 2 ta aviatashuvchi (“Uzbekistan Airways” va “Air Astana”), Toshkent – Moskva yo‘nalishida ham 2 ta aviakompaniya (“Uzbekistan Airways” va “Aeroflot”) to‘g‘ridan – to‘g‘ir parvozlarni amalga oshirib kelayotganini bildirgan.

“Mazkur yo‘nalishlarda raqobatning rivojlanmaganligi esa aviatashuvchi kompaniyalarning o‘zaro kelishib harakat qilishlariga zamin yaratadi”, – deyiladi Qo‘mita jajvobida.

Monopoliyaga qarshi kurashish qo‘mitasi ushbu holat yuzasidan Transport vazirligiga bir qator takliflar yuborganini ma’lum qildi. Bildirilgan takliflarning ijro etilishi Senatning Mudofaa va xavfsizlik qo‘mitasi tomonidan nazoratga olingan.