Ijtimoiy tarmoqlarda Xalq deputatlari Andijon shahar kengashining navbatdagi sessiyasida bir guruh deputatlar Milliy gvardiya xodimlari tomonidan tintuvdan o‘tkazilgani aks etgan surat tarqaldi.

Parlament Quyi palatasi deputati Rasul Kusherbayev ushbu holatda deputat daxlsizligiga amal qilinmaganini takidladi.

“Katta ehtimol bilan deputatlarni daxlsizlik huquqigayam tupurib tintuv o‘tkazishga topshiriq berganlar yer sotish ishlariga daxldor va deputatni daxlsizlik huquqidan mahrum qilib qamashga ishtiyoqmand "o‘sha" shaxslar bo‘lishi kerak”, – deydi Rasul Kusherbayev.

Shuningdek, u noqonuniy tintuv o‘tkazish uchun taqdimnoma kiritgan qonun himoyachisi prokurorning holatni qanday izohlashiga qiziqishini bildirib, bu savolning ochiq qolayotganini ta’kidlaydi.

Ma’lum qilinishicha, mazkur sessiya ishida Andijonda yer sotuvchilarning kirdikorlarini fosh qilib yurgan mahalliy deputat prokuror taqdimnomasiga ko‘ra daxlsizlik huquqidan mahrum qilingan.

Eslatib o‘tamiz, Xalq deputatlari Andijon shahar kengashining mazkur sessiyasi 2021-yil 17-may kuni bo‘lib o‘tgan.