Prezidentning “2021-yilda yangi ish o‘rinlarini tashkil etish va aholi bandligiga ko‘maklashish bo‘yicha davlat dasturi to‘g‘risida”gi qarori qabul qilindi. 
Dasturga ko‘ra:

– 457,1 mingta doimiy yangi ish o‘rinlarini tashkil etish nazarda tutilmoqda. Masalan, yangi kichik korxonalarni tashkil etish hamda milliy hunarmandchilikni rivojlantirish hisobiga 210 mingga yaqin yangi ish o‘rinlari tashkil etiladi;

– aholi bandligiga ko‘maklashish va ish beruvchilarni rag‘batlantirish bo‘yicha 513,5 mingta fuqaroga xizmatlar ko‘rsatiladi. Jumladan, 280 mingdan ortiq fuqaro bo‘sh va zaxira ish o‘rinlariga ishga joylashtirilsa, 110 mingdan ortig‘i haq to‘lanadigan jamoat ishlariga jalb qilinadi.

Shuningdek, “Barcha uchun ish” tamoyili asosida 1 noyabrga qadar quyidagilarni nazarda tutuvchi “Mening ishim” buyurtmalar birjasi onlayn-maydoni ishga tushiriladi:

– ishsizlar uchun ishlar, masofadan turib bajariladigan ishlar, uyda bajariladigan ishlar, kasanachilik ishlari, frilanserlik faoliyati, ish grafiklari, talab etiladigan malaka darajasi, ish haqi miqdori va boshqalar;

– o‘zini o‘zi band qilgan shaxslarning faoliyat turlarini reklama qilish va ularning xizmatiga ehtiyoji bor ish beruvchilar o‘rtasida kunlik va uzoq muddatli oferta shartnomasi tuzish va boshqalar.