Ma'lumki, Osiyo o‘zining nozik did bilan tayyorlangan, tanqis, ziravorli va xushbo‘y taomlari bilan mashhur, biroq ayrim davlatlarda shunday g‘alati, hatto jirkanch taomlar tayyorlanadiki, qachondir ularni tatib ko‘rishga ko‘nglingiz tortishi amrimahol.   

Baliqchi qush vinosi 

Inuitlar (kanadalik eskimoslar) tayyorlaydigan ichimlik shunday ataladi. Bu g‘alati ichimlikning tayyorlanish usuli quyidagicha: o‘lik baliqchi qushni suv to‘ldirilgan idishga solib, bir necha kun quyosh tig‘ida qoldirishadi. Bu vinodan ichib ko‘rgan yevropaliklar uning ta'mini shunday tasvirlashgan: “Agar “Toyota” karbyuratini ochib, ichida qolgan suyuqlikni ichsangiz, o‘sha dahshatli ichimlik ta'mini his qilasiz”. Biroq vinoning undan farqi shuki, juda tez mast qiladi. Undan keying bosh og‘rig‘i ham juda yomon. 

Xaukarl

Islandlarning grenland qutb akulasi yoki katta akulaning sasigan go‘shtidan iborat milliy taomi. Yangiligida qutb akulasining go‘shti ammiak ko‘pligi uchun zaharli hisoblanadi, shuning uchun akula go‘shtini bo‘laklab, shag‘al to‘ldiirlgan maxsus idishlarga taxlashadi. Go‘sht u yerda 5-8 hafta, ba'zan undan ham ko‘proq (mavsumga qarab) qoladi. Keyin yaxshigina sasigan go‘shtni olib, maxsus qoziqlargi ilib, yana 2-4 oy ochiq havoda qoldirishadi. Bu orada go‘sht bo‘laklarining usti qotadi, parda hosil qiladi, bu joylari kesib tashlash kerak bo‘ladi. Sarg‘ish ichki qismi dasturxonga tortiladi.  

Lyutefisk

Norvegiya, Shvetsiya va Finlyandiyaning ayrim joylarida ommalashgan qishki tansiq taom, skandinavlarning an'anaviy baliqli taomi. Avval taom treskadan tayyorlanardi, hozirda esa Shvetsiyada quritilgan dengiz cho‘rtani yoki sayda kengroq tarqalgan, ammo Norvegiyada hali ham treskadan tayyorlashadi. Quritilgan baliqni tayyorlash uchun uch sutkaga kaustik sodaning ishqorli eritmasiga solib qo‘yishadi. Shundan so‘ng bir necha kun suvga solib ivitishadi. Baliq oqsillarining ishqor bilan kimyoviy reaksiyasi natijasida baliq yumshoq jyelesimon shaklga kelib, hidi o‘tkirlashadi. Keyin lyutefiskni tovada qovurib, duxovkada toblashadi, qaynatishadi yoki mikroto‘lqinli pechda pishirishadi.

Balyut (balut)

O‘rdakning ichida jo‘janing patlari, tog‘ay va tumshug‘i shakllanib bo‘lgan qaynatilgan tuxumi. Janubi-Sharqiy Osiyo (Vetnam, Kamboja, Laos, Malayziya, Tayland, Xitoyning janubiy provinsiyalari, Filippin)da tanovul qilinadi. Ba'zan tuxumni xomligichi, soya sousi bilan yoki qovurib yeyishadi. Balyutning ta'mi qaynatilgan mol jigarining mazasiga o‘xshaydi. Balyutni qora murch va tuz sepib iste'mol qilishadi. 

Yuz yillik tuxum

Xitoy oshxonasida keng tarqalgan gazak. Yuz yillik tuxumni tayyorlash usullari ko‘p, lekin asosiy qoida shunday: tovuq yoki o‘rdak tuxumiga choy, tuz, ohak va kul aralashmasini surishadi, keyin sholi po‘sti va tuproqqa belab, savatlarga solishadi-da, uch-to‘rt oyga ko‘mib qo‘yishadi. Bu taomga havo tegmasligi, tuxum bir necha oy ishqorli muhitda bo‘lishi uchun qilinadi. 3-4 oy o‘tgach, tuxum oqsili yarimshaffof jyelesimon moddaga aylanadi, sarig‘i esa kul rang-yashil tusga kirib, ammiakning o‘tkir hidi sezilib turadi. 

Jyekfrut 

Bangladesh miliy mevasi, daraxtga o‘sadigan, yeyish mumkin bo‘lgan eng katta meva. Yetilgan mevaning po‘chog‘i va urug‘idan o‘tkir yoqimsiz, sasigan piyoznikiga o‘xshash hid keladi. Etining hidi esa yoqimli, banan va ananasnikiga o‘xshaydi. 

Syurstryomming 

Shvedlarning milliy mahsuloti. Konservalangan tuzlangan seld. Tozalangan seld tuzlanadi, ochiq idishga solinib, bijg‘itiladi. Bu jarayon vaqtida mahsulot fermentlari va bakteriyalar propion, moy va sirka kislotasi, shuningdek, vodorod sulfid hosil qiladi. Keyin seld yana bijg‘ishi uchun konserva bankalariga solinadi. Natijada u yumshab, nihoyatda sassiq hid chiqara boshlaydi.  

Kopi Luvak

Qahvaning o‘ziga xos usulda qayta ishlangan turi. Qahva donlarini ishlab chiqarish jarayonida musang (hayvoncha) qahva daraxtining yetilgan mevalarini yeb, etini hazm qiladi, donini esa — yo‘q. Odamlar hayvonchaning axlatini yig‘ib, yuvishadi va oftobda quritishadi. Qahvaning o‘ziga xos ta'mi musangning oshqozon shirasidagi tsivetin degan fermentga bog‘liq. 

Kiviak 

Grenlandiyada yashaydigan kalaalit, eskimos va inuitlarning an'anaviy qishki taomi. Tyulen terisiga 400ga yaqin tozalanmagan chistik, gagara va baliqchi qushni joylab, teridan havoni chiqarib yuborishadi. Uni yog‘ bilan bekitib yopishtirib, 3 oydan 18 oygacha yerga tosh bostirib qo‘yishadi. Bu vaqt davomida qushlar sekin-asta marinadlanadi. Qushlarni qazib olib, patlaridan tozalab, xomligicha, terisi va suyaklari bilan yeyish mumkin. Kiviakning mazasi achchiq va sassiq pishloqqa o‘xshaydi.